लमजुङको चिनारी कृषि फार्ममा आगलागी, डेढ करोडभन्दा बढीको क्षति

अर्थ वाणिज्य

शान्ता कमली
लमजुङको मध्यनेपाल नगरपालिका–१ जिता देउरालीमा रहेको चिनारी कृषि फार्ममा विद्युत् सर्ट भएर आगलागी हुँदा डेढ करोडभन्दा बढीको क्षति भएको छ । आगलागीमा फार्ममा रहेको एक सय २५ बाख्रा र दुई सय ७४ लोकल कुखुरा जलेर नष्ट भएको प्रहरीले जनाएको छ । जिल्ला प्रहरी कार्यालय लमजुङका प्रमुख डिएसपी रविन्द्रमान गुरुङका अनुसार मंगलबार साँझ पौने ७ बजे अचानक विद्युत् सर्ट भएपछि फार्ममा आगलागी भएको हो ।

फार्ममा एक सय ७० बाख्रा र तीन सय लोकल कुखुरा थिए । जसमध्ये २६ वटा कुखुरा र ४५ वटा बाख्रा जिउँदै भेटिएकोे छ । आगलागीमा बाख्राका दुईवटा आधुनिक खोर र गोदाम घर जलेर नष्ट भएको फार्मका सञ्चालक रमेश पौडेलले बताए । उनका अनुसार ०७२ सालबाट ६० वटा बाख्रा र ५० वटा लोकल कुखुराबाट डेढ सय रोपनी जग्गामा चिनारी कृषि फार्म सञ्चालन गरिएको हो ।

चार करोड लगानीबाट सुरु गरिएको फार्ममा हाल पाँच करोड लगानी पुगेको पौडेलले बताए । अचानक आगलागी हुँदा पशु चौपाया तथा अन्य भौतिक संरचना जलेको उनले बताए । स्थानीय र प्रहरीको सहयोगमा आगो नियन्त्रणमा लिइएको थियो । आगलागीको कारणबारे यकीन जानकारी प्राप्त नभएको प्रहरीले जनाएको छ ।

Leave a Reply

Your email address will not be published. Required fields are marked *