अविरल वर्षाका कारण आएको पहिरो र लेदोले बीपी राजमार्ग पूर्ण रूपमा अवरुद्ध भएको छ । राजमार्गका विभिन्न खण्डमा माथिबाट पहिरो खसेपछि सवारी साधनको आवतजावत ठप्प बनेको हाे ।
बीपी राजमार्गअन्तर्गत काभ्रेको नार्के क्षेत्रमा माथिबाट लेदोसहितको ठूलो पहिरो झरेको छ भने लगातार वर्षा भइरहेकाले अझै थप पहिरो खस्ने जोखिम कायमै रहेको छ । राजमार्गका धेरै स्थानमा पहिरो र लेदोले क्षति पुर्याएको र सडक खुलाउनका लागि प्रहरी र प्राविधिक टोलीले पहिरो पन्छाउने काम सुरु गरेकाे बताइएकाे छ ।
उक्त राजमार्ग अवरुद्ध भएसँगै काठमाडौँबाट पूर्वतर्फ छुटेका र पूर्वबाट काठमाडौँ आउँदै गरेका सयौँ सवारीसाधन बिच बाटोमै रोकिएका छन् । काठमाडौँबाट पूर्वतर्फ गएका सवारीसाधनहरूलाई काभ्रेको भकुण्डेबेँसीमा र पूर्वबाट काठमाडौँतर्फ आउँदै गरेका सवारीसाधनहरूलाई सिन्धुलीको खुर्कोटमा रोकिएको प्रहरीले जनाएकाे छ ।
रातिदेखिकाे अविरल वर्षाले पहिरो झर्ने क्रम नरोकिएकाले सडक खुलाउन केही समय लाग्न सक्ने प्रहरीकाे भनाइ रहेको छ। सम्भावित जोखिमलाई ध्यानमा राख्दै काभ्रे र सिन्धुली प्रहरीले सडकको अद्यावधिक अवस्था बुझेर मात्र यात्रा गर्न सर्वसाधारणलाई आग्रह गरेकाे छ ।
