काठमाण्डू, नेपाली कांग्रेसको संस्थापन इतर समूहले आयोजना गरेको राष्ट्रिय भेला काठमाडौंमा शुरु भएको छ।
शुक्रबार दिउँसो कांग्रेसका पूर्वसभापति शेरबहादुर देउवाको प्रमुख आतिथ्यमा भेलाको उद्घाटन गरिएको हो।
केही समयपछि स्वदेश फर्किएका देउवा प्रमुख अतिथिका रूपमा सहभागी भएपछि भेलाले कांग्रेसको आन्तरिक राजनीतिमा थप चर्चा पाएको छ।
कार्यक्रममा देउवालाई ‘नेपाली कांग्रेसका सभापति’ भनेर सम्बोधन गरिएको थियो।
डा। शशांक कोइरालाको अध्यक्षतामा भइरहेको भेलामा कांग्रेसका नेता डा. शेखर कोइराला, प्रकाशमान सिंह, विमलेन्द्र निधि र कृष्णप्रसाद सिटौलालगायत नेताहरू सहभागी छन्।
भेलामा पार्टीको वर्तमान अवस्था, संगठन सुदृढीकरण, नेतृत्वको भूमिका तथा आगामी राजनीतिक रणनीतिका विषयमा छलफल हुने बताइएको छ।
देउवाको सहभागितालाई भने कांग्रेसभित्र विकसित पछिल्लो राजनीतिक परिस्थितिसँग जोडेर हेरिएको छ।
सुजाता अनुपस्थित, गगनलाई समर्थन
यसैबीच कांग्रेस नेतृ सुजाता कोइराला भने उक्त भेलामा सहभागी भएकी छैनन्।
सुजाता शुक्रबार नै पार्टीको केन्द्रीय कार्यालय सानेपा पुगेर सभापति गगन थापालाई समर्थन गरेकी थिइन्। त्यसपछि उनी इतर समूहको भेलामा उपस्थित नभएकी हुन्।
एकातिर इतर समूहको भेलामा देउवाको उपस्थिति र अर्कोतर्फ सुजाता कोइरालाले थापालाई समर्थन गरेपछि कांग्रेसभित्रको आगामी नेतृत्व तथा राजनीतिक समीकरणबारे चासो थपिएको छ।
भेलाबाट कांग्रेसको आन्तरिक एकता, नेतृत्व र भावी राजनीतिक दिशाबारे कस्तो धारणा सार्वजनिक हुन्छ भन्ने विषयलाई पार्टीभित्र र बाहिर चासोका साथ हेरिएको छ।
