आज बडादशैँकाे पहिलाे दिन घटस्थापना

हरेक वर्ष आश्विन शुक्ल प्रतिपदादेखि विधिवत् रुपमा आरम्भ गरिने नेपालीको महान पर्व बडादशैँ आजदेखि सुरु भएको छ । आजदेखि सुरु भएकाे यस बडादशैँ आश्विन शुक्ल पूर्णिमासम्म १५ दिन धुमधामका साथ मनाउने गरिन्छ ।

आज बडादशैँको पहिलो दिन घरघरमा विधिपूर्वक दियो, कलश र गणेश स्थापनासहित घटस्थापना गरिन्छ । पूजा कोठा वा दशैँ घरमा वैदिक विधिपूर्वक शक्तिकी अधिष्ठात्री देवी दुर्गाको आह्वान गरी पूजा आरम्भ गरेर बडादशैँकाे सुरु गरिने परम्परा रहेकाे छ ।

आज बिहानै नित्यकर्म समाप्त गरी नजिकको नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजा कोठा अथवा दशैँ घरमा विधिपूर्वक जमरा रोप्ने राखिन्छ । यव अङ्कुर अर्थात जमरा दुर्गा देवीको प्रिय वस्तु भएकाले आज यव रोपण गरी दुर्गालाई चढाएर विजयादशमीको दिन टीका प्रसादसितै समृद्धिको प्रतीक पहेँलो जमरा ग्रहण गरिन्छ ।

आजैको दिन विधिपूर्वक घट अर्थात् घडा स्थापना गरी त्यही घडामाथि शक्तिस्वरुपा दुर्गाको पूजा आराधना गरिने भएकाले आजको दिनलाई घटस्थापना समेत भन्ने गरिन्छ । आज घटस्थापनाको साइत बिहान ११ बजेर ४७ मिनेटमा रहेको नेपाल पञ्चाङ्ग निर्णायक विकास समितिले जनाएको छ ।