आज बिहाना गोरखाको बूढीगण्डकी नदीमा आएको बाढीले बस्ती र पुल बगाएकाे छ । बाढीले चुमनुब्री गाउँपालिकाको पैयू र बगर गाउँका ३५ घर बगाएको छ भने दोभान, घट्टेखोला, जगत् र सल्लेरी गाउँमा व्यापक क्षति भएको चुमनुब्री गाउँपालिकाकी उपाध्यक्ष लक्ष्मी गुरुङले जानकारी दिएकी छन् ।
त्यसैगरि बाढीले आरुघाट गाउँपालिकास्थित सोती र मान्बु जोड्ने मोटरेबल पुल बगाएको छ । बिहान चुमनुब्री गाउँपालिकास्थित उङ्गेल खोलाबाट आएको बाढीसँगै स्यार खोलामा पहिरोसमेत आएको थियाे ।
स्थानीयका अनुसार स्यार खोलामा पानी थुनिएर एक्कासि बाढी आएको थियाे भने उक्त बाढीका कारण बूढीगण्डकी नदीमा समेत पानीको बहाव बढेको सहायक प्रमुख जिल्ला अधिकारी नेत्रप्रसाद शर्माले जानकारी दिएका छन् ।
आज बिहान ४ बजे तिरकाे समयमा आएको बाढी गाउँमा पसेपछि स्थानीय सुरक्षित स्थानतर्फ भागेका थिए । बाढीको जोखिमलाई ध्यानमा राखेर सिर्दिबास तथा धार्चे गाउँपालिकाका खोर्लाबेँसी, माछाखोला, सोती, आर्खेत र आरुघाटका बासिन्दालाई सुरक्षित स्थानमा जान आग्रह गरिएको जिल्ला प्रहरी कार्यालय गोरखाले जानकारी दिएकाे छ ।
