दुईजना ऐतिहासिक व्यक्तित्वहरु बिसे नगर्ची र बाङ्गे सार्कीको सम्मानमा हुलाक टिकट प्रकाशन गरिएको छ । उनीहरूको सम्मानमा हुलाक सेवा विभागले हुलाक टिकट प्रकाशन गर्दै प्रथम दिवसीय टाँचा लगाएको हो ।
यस कार्यमा प्रथम दिवसीय टाँचा लगाउने अवसर पाउँदा आफूलाई गर्व र सन्तोषको अनुभूति भएको विक्रम तिमिल्सिनाले बताए । उनले यस महत्त्वपूर्ण कार्यका लागि हुलाक सेवा विभाग र सम्बन्धित सबैलाई हार्दिक धन्यवाद समेत दिएका थिए ।
तिमिल्सिनाले यस कदमलाई नेपालको इतिहासलाई अझ समावेशी दृष्टिले हेर्ने र राष्ट्र निर्माणमा दलित समुदायले पुर्याएको योगदानलाई उचित स्थान दिने महत्त्वपूर्ण सन्देशका रूपमा व्याख्या गरेका थिए ।
इतिहासमा योगदान गर्ने सबैको सम्मान हुनु नै न्यायपूर्ण समाजको मुख्य आधार भएको उनको भनाइ रहेकाे थियाे । राज्यको यो कदम दुई ऐतिहासिक व्यक्तित्वको सम्मानमा मात्र सीमित नरही समग्र दलित समुदायको आत्मसम्मान, पहिचान र गौरवसँग जोडिएको पनि उनले स्पष्ट पारेका थिए ।
नेपाल एकीकरणको समयमा गोर्खाका राजा पृथ्वीनारायण शाहलाई आर्थिक र रणनीतिक सल्लाह दिने बिसे नगर्ची र हातहतियार तथा छालाका सामग्री निर्माणमा योगदान गर्ने बाङ्गे सार्कीको भूमिकालाई नेपाली इतिहासमा उच्च महत्त्वका साथ हेरिन्छ ।
