त्रिभुवन अन्तर्राष्ट्रिय विमानस्थलले यात्रुहरूको ब्यागेज व्यवस्थापनलाई थप पारदर्शी, व्यवस्थित र यात्रुमैत्री बनाउन ब्यागेज ड्रप एरियाको लाइभ फिड अब आगमन कक्ष (अराइभल एरिया) को ब्यागेज क्लेम क्षेत्रमा उपलब्ध गराएको छ ।
उक्त व्यवस्था संस्कृति, पर्यटन तथा नागरिक उड्डयन मन्त्री खडकराज पौडेल ‘गनेस’को पहलमा सुरु गरिएको र उक्त व्यवस्थाबाट अन्तर्राष्ट्रिय उडानमार्फत नेपाल आउने यात्रुले विमानबाट झारिएको आफ्नो सामान ब्यागेज बेल्टसम्म आइपुग्ने प्रक्रियालाई प्रत्यक्ष अवलोकन गर्न सक्नेछन् ।
नयाँ सुरु गरिएकाे व्यवस्थाले यात्रुलाई आफ्नो सामानको अवस्थाबारे जानकारी लिन सहज बनाउनुका साथै ब्यागेज प्राप्त गर्न लाग्ने समयको अनुमान गर्न समेत सहयोग पुग्ने अपेक्षा गरिएको बताइएकाे छ ।
यसअघि विमानबाट झारिएको सामान ब्यागेज क्लेम क्षेत्रमा आइपुग्न कति समय लाग्छ भन्नेबारे यात्रुले प्रत्यक्ष जानकारी पाउने नभएकाे र सामानको प्रतीक्षामा यात्रुहरू अन्योलमा पर्ने तथा ब्यागेज व्यवस्थापन प्रक्रियाबारे पर्याप्त सूचना नहुँदा असहजता हुने गरेको थियो ।
नयाँ व्यवस्था पछि ब्यागेज ड्रप क्षेत्रमा भइरहेका गतिविधि आगमन कक्षबाटै हेर्न सकिने भएपछि यात्रुको प्रतीक्षा थप सहज र व्यवस्थित हुने विश्वास गरिएको छ । पछिल्लो समय मन्त्री पौडेलले विमानस्थलको सेवा सुधार, प्रविधिको उपयोग र यात्रुको सुविधालाई प्राथमिकतामा राख्दै विभिन्न पहल गर्दै आएका छन् ।
विमानस्थलमा प्रविधिको प्रयोग बढाउँदै सेवा प्रवाहमा पारदर्शिता कायम गर्ने यो प्रयासलाई यात्रु सेवाको गुणस्तर अभिवृद्धि गर्ने कदमका रूपमा हेरिएको छ भने यसले त्रिभुवन अन्तर्राष्ट्रिय विमानस्थलको सेवा अनुभवलाई थप प्रभावकारी, आधुनिक र यात्रुमैत्री बनाउन सहयोग पुग्ने अपेक्षा गरिएको छ ।
