काठमाण्डू, सरकारले धितोपत्र बोर्डको अध्यक्षमा सन्तोषनारायण श्रेष्ठलाई नियुक्त गर्ने निर्णय गरेको छ ।
मन्त्रिपरिषद्को सोमबार बसेको बैठकले श्रेष्ठलाई अध्यक्षमा नियुक्त गरेको बैठकमा सहभागी एक मन्त्रीले जानकारी दिए ।
विद्युत् प्राधिकरणको सञ्चालक समेत रहेका श्रेष्ठ व्यवसायि हुन् । बोर्ड २०८० साल पुस २० देखि नेतृत्वविहीन थियो ।
तत्कालीन अध्यक्ष रमेश हमालको दुई वर्षे कार्यकाल २०८० पुस २० गते सकिएको थियो ।
धितोपत्र सम्बन्धी ऐन, २०६३ मा नेपाल धितोपत्र बोर्डको अध्यक्ष पद रिक्त भएमा अर्थ मन्त्रालयबाट प्रतिनिधित्व गर्ने सदस्यले बोर्डको अध्यक्ष हैसियतमा काम गर्ने व्यवस्था छ ।
त्यसैअनुसार नयाँ अध्यक्ष नियुक्त नहुन्जेल अर्थमन्त्रालयले कर्मचारीलाई नै अध्यक्षको हैसियतमा पठाउँदै आएको थियो । अब भने बोर्डले नयाँ अध्यक्ष पाएको हो ।
हमालको कार्यकाल सकिएपछि २०८० माघ ३ गते सरकारले राष्ट्रिय योजना आयोगका तत्कालीन उपाध्यक्ष मीनबहादुर श्रेष्ठको संयोजकत्वमा सिफारिस समिति गठन गरेको थियो ।
सो समितिले फागुन १४ गते सूचना जारी गर्दै अध्यक्षमा दरखास्त आह्वान गरेको थियो । अध्यक्षका लागि फागुन ३० गतेसम्म १९ जनाले आवेदन दिए । सोमध्ये ५ जना सर्टलिस्ट परे ।
सर्टलिस्टमा परेका ५ जनालाई असारको पहिलो साता अन्तरवार्ताका लागि बोलाइयो । तर, सन्तोषनारायण श्रेष्ठ र मुक्ति श्रेष्ठ मात्रै अन्तरवार्ताका लागि आएका थिए ।
सर्टलिस्टमा परेकाहरुमध्ये चिरञ्जीवी चापागाईँ, कृष्णबहादुर कार्की र नवराज अधिकारी आएनन् ।
अन्तरवार्तामा ३ जना सहभागी नभएपछि धितोपत्र बोर्ड ऐन २०६३ का अनुसार बोर्डको अध्यक्षका तीनजनाको नाम मन्त्रिपरिषद्मा सिफारिस गर्नुपर्ने व्यवस्था छ ।
२ जना मात्रै अन्तर्वार्तामा आएपछि ३ जनाको नाम सिफारीस गर्न नमिलेपछि पुनः अध्यक्ष छनौट समितिले असार दोस्रो साता एक सूचना जारी गर्दै अध्यक्ष नियुक्ति सम्बन्धी सम्पूर्ण प्रक्रिया रद्ध गरेको थियो ।
