काठमाण्डू, पूर्वप्रधानमन्त्री एवं नेकपा एमालेका अध्यक्ष केपी ओलीले सरकारले आफूलाई गैरकानूनी रुपमा हिरासतमा राखेको बताएका छन् ।
बिहीबार हाजिरी जमानीमा छुटेपछि ओलीले सामाजिक सञ्जालमा लेख्दै आफूलाई सरकारले फौजदारी अभियोग लगाइ १३ दिनसम्म गैरकानूनी नियन्त्रणमा राखे पनि मुद्दा चलाउने आधार र प्रमाण पुर्याउन नसकेको बताए ।
‘सरकारले पूर्वाग्रह र प्रतिशोधपूर्ण रूपमा फौजदारी अभियोग लगाई १३ दिनसम्म गैरकानूनी नियन्त्रणमा राखे पनि मुद्दा चलाउने आधार र प्रमाण नपुगेपछि अन्ततः म रिहा भएको छु,’ उनले भनेका छन् ।
त्यस्तै ओलीले आफू पक्राउ पर्दा आफ्नो रिहाइका लागि आवाज उठाउने सबैप्रति धन्यवाद व्यक्त गरेका छन् ।
साथै आफूलाई साथ दिने कानून व्यवसायी, न्यायको पक्षमा वकालत गर्ने राजनीतिक दल, सञ्चारकर्मी, प्रहरी प्रशासनदेखि सर्वोच्च अदालतलप्रति धन्यवाद दिएका छन् ।
यता आफू पक्राउ पर्दा सडक आन्दोलनबाट घाइते भएकाहरुको उपचार राज्यले निःशुल्क गर्नुपर्ने समेत माग राखेका छन् ।
ओलीलाई प्रहरीले १३ दिनअघि अर्थात् गत चैत १४ गते शनिबार बिहानै पक्राउ गरेको थियो । ओली हिरासतमा नबसी त्रिवि शिक्षण अस्पताल महाराजगञ्जमा बसेका थिए ।
यता तत्कालीन गृहमन्त्री रमेश लेखकलाई समेत आजै हाजिरी जमानीमा छाडिएको छ ।
जेनजी आन्दोलनका बेला प्रधानमन्त्री र गृहमन्त्री रहेका ओली लेखकको कारण नै युवायुवतीहरुको ज्यान गएको भन्दै जाँचबुझ आयोगको प्रतिवेदनको सिफारिसका आधारमा पक्राउ गरिएको थियो ।
ओलीले सामाजिक सञ्जालमा भनेका छन् स्
सरकारले पूर्वाग्रह र प्रतिशोधपूर्ण रूपमा फौजदारी अभियोग लगाई १३ दिनसम्म गैरकानूनी नियन्त्रणमा राखे पनि मुद्दा चलाउने आधार र प्रमाण नपुगेपछि अन्ततः म रिहा भएको छु।
मेरो रिहाइका लागि आवाज उठाउनुहुने सम्पूर्ण न्यायप्रेमी दिदीबहिनी तथा दाजुभाइहरू, कानुनी लडाइँमा अहोरात्र साथ दिनुहुने कानून व्यवसायी मित्रहरू, न्यायकर्मीहरु, न्यायको पक्षमा वकालत गर्ने विभिन्न राजनीतिक दल, नेताहरू र सञ्चारकर्मीहरूप्रति आभार प्रकट गर्दछु। साथै, परमादेश जारी गर्ने सम्मानित सर्वोच्च अदालतप्रति उच्च सम्मान व्यक्त गर्दछु।
प्रहरी नियन्त्रणमा रहँदा मप्रति मानवीय व्यवहार गर्ने प्रहरी प्रशासन र मेरो स्वास्थ्योपचारमा तल्लीन त्रिवि शिक्षण अस्पताल परिवारप्रति पनि म कृतज्ञ छु।
मेरो रिहाइको माग गर्नेहरूमाथि चर्को दमन गरी घाइते बनाएका सबै घाइतेहरुको शीघ्र स्वास्थ्यलाभको कामना गर्दछु ।
उहाँहरूको उपचार खर्च राज्यले बेहोर्नु पर्दछ, यसमा राज्य उदासीन भए पार्टीले उपचार खर्च बेहोर्ने जानकारी गराउँछु।
प्रतिकूल स्वास्थ्य अवस्थाका कारण केही दिन अस्पतालमै रहेर उपचार गराउने जानकारी गराउँदै यस घडीमा सद्भाव र शुभेच्छा प्रकट गर्नुहुने पार्टीका समग्र नेता(कार्यकर्ता एवं समस्त शुभचिन्तकहरूमा हार्दिक आभार व्यक्त गर्दछु।
