अध्यागमन विभागले विदेशी पर्यटकलाई निषेधित क्षेत्रमा पूर्वअनुमति लिएरमात्र पदयात्रामा लैजान निर्देशनयुक्त चेतावनी दिएको छ । अनुमतिबिनै केही ट्रेकिङ एजेन्सीले विदेशी पर्यटकलाई निषेधित क्षेत्रमा पदयात्रामा लगेपछि विभागले निर्देशनयुक्त चेतावनी दिएको हो ।
विभागले एक विज्ञप्ति जारी गर्दै अनुमति लिएरमात्र विदेशीलाई पदयात्रामा लैजान आग्रह गरेको हाे । विभागकाे निर्देशनलाई बेवास्ता गरेमा कानूनबमोजिम कारबाही गरिने चेतावनी छ । विज्ञप्तिमा भनिएको छ, ‘पदयात्रा अनुमति लिएरमात्र विदेशीहरुलाई पदयात्रामा लैजान विभागले पुनः अनुरोध गर्दछ । आगामी दिनमा यस प्रकारका गैरकानूनी गतिविधि भए गरेको पाइएमा विद्यमान अध्यागमन कानूनबमोजिम कारबाही हुने व्यहोरासमेत सम्बद्ध सबैमा जानकारी गराइन्छ ।’
विभिन्न १३ जिल्लाका तोकिएका निषेधित क्षेत्रमा विदेशी नागरिकले पदयात्रा गर्न अध्यागमनबाट अनिवार्य रुपमा अनुमति लिनुपर्ने व्यवस्था गरेकाे छ । विभागका अनुसार पदयात्रा अनुमतिसम्बन्धी सम्पूर्ण कार्य अनलाइन माध्यमबाट हुने भएकाले भौतिक रुपमा उपस्थित हुनुपर्ने अवस्था छैन । साथै, अनुमतिको लागि आवश्यक कागजात वा अन्य प्राविधिक समस्या भएमा सहजीकरणका लागि छुट्टै सम्पर्क नम्बर ९७६१४२३६३६ मा सम्पर्क गर्न सकिन्छ ।
