धार्मिक सद्भाव खलबलिने निर्णय नगर्न बौद्ध धर्मसम्बद्ध संघसंस्थाले सरकारसँग आग्रह गरेका छन् ।बौद्ध दर्शन प्रवर्द्धन तथा गुम्बा विकास समिति खारेजी सिफारिसप्रति गम्भीर ध्यानाकर्षण जनाउँदै उनीहरुले यस्तो आग्रह गरेका हुन् ।
आज विज्ञप्ति जारी गर्दै उनीहरुले धार्मिक एवम् साम्प्रदायिक सद्भाव, सहिष्णुता खलबलिने खालका कुनै पनि निर्णय नगर्न सरकारलाई आग्रह गरेका छन् । गत चैत ३ गते सुशासन मार्गभित्र समितिले समिति खारेज गर्न सरकारसमक्ष सिफारिस गरेको थियो । त्यो थाहा पाउनेबित्तिकै सरोकालावाला निकायलाई ज्ञापनपत्र बुझाएको स्मरण गराउँदै उनीहरुले पुनः सरकारको ध्यानाकर्षण गराएका हुन् ।
समितिको खारेजीले बौद्ध सम्पदा तथा शिक्षा संरक्षण, प्रवर्द्धन तथा विकास गम्भीर असर पर्ने उनीहरुको ठहर छ । विज्ञप्तिमा भनिएको छ, ‘बौद्ध दर्शनको प्रवर्द्धन लुम्बिनी विश्वविद्यालयबाट नभई गुम्बा, बिहार, वाहावहीमार्फत बौद्ध दर्शन, शिल, समाधी, आगम, अविषेक, धर्मदेसना, प्रज्ञा, पञ्चशिल, आर्य अष्टांगिक मार्गजस्ता बौद्ध शिक्षा जनमानससम्म पुर्याइ अभ्यास गराई प्रगतिशील शान्ति र सभ्य नागरिक निर्माण गरिने बौद्ध दर्शन प्रवर्द्धन तथा गुम्बा विकास समिति खारेजी हुन दुःखद विषय हो ।’
