महोत्तरीमा अत्यधिक गर्मी बढेसँगै विद्यालयहरु बन्द गर्न थालिएकाे छ । गर्मीका कारण जिल्लाकाे गाैशला नगरपालिकाले नगर क्षेत्रभित्र सञ्चालित सबै विद्यालयको पठनपाठन पाँच दिनका लागि बन्द गरेकाे छ । अत्यधिक गर्मीका कारण विद्यार्थीहरूको स्वास्थ्यमा गम्भीर प्रतिकूल असर पर्न थालेपछि विद्यालयको पठनपाठन पाँच दिनका लागि बन्द गर्ने निर्णय गरेको हाे ।
पछिल्ला केही दिनदेखि निरन्तर बढिरहेको गर्मीले जनजीवन प्रभावित हुनुका साथै शैक्षिक संस्थामा अध्ययनरत विद्यार्थीको स्वास्थ्यमा गम्भीर असर पर्ने अवस्था देखिएपछि नगर कार्यपालिकाको बैठकले उक्त निर्णय गरेकाे पालिकाका प्रमुख प्रशासकीय अधिकृत ओमबहादुर अधिकारीले जनाएका छन् ।
विद्यार्थीहरूको स्वास्थ्य सुरक्षा तथा हितलाई मध्यनजर गर्दै नगर क्षेत्रभित्र सञ्चालित सबै सामुदायिक, संस्थागत तथा धार्मिक विद्यालयहरूको पठनपाठन बन्द गरिएकाे छ । पछिल्ला केही दिनयता नगर क्षेत्रको तापक्रम ३८ देखि ४० डिग्री सेल्सियससम्म पुगेपछि विद्यालयमा अध्ययनरत बालबालिकाको स्वास्थ्य जोखिम निकै बढेको छ र कतिपय विद्यार्थीहरू बिरामी पर्न थालेका छन् ।
नगर शिक्षा शाखाको तथ्यांक अनुसार गौशाला नगरपालिकाभित्र ३१ सामुदायिक, ३० संस्थागत र सात धार्मिक गरी कुल ६८ विद्यालयहरू सञ्चालनमा छन् । उक्त विद्यालयहरुमा २० हजारभन्दा बढी विद्यार्थीहरू अध्ययनरत रहेकाे बताइएकाे छ ।
