आजदेखि चितवनमा राष्ट्रिय स्वतन्त्र पार्टी (रास्वपा)काे महाधिवेशन सुरु हुँदैछ । महाधिवेशनको अन्तिम तयारी पूरा भएसँगै आज महाधिवेशनको उद्घाटनकाे तयारी गरिएकाे रास्वपा चितवनका अध्यक्ष मिनीमाधव खनालले जानकारी गराएका छन् ।
महाधिवेशनको उद्घाटनका लागि चितवनकाे भरतपुर महानगरपालिका–१०, स्थित जिल्ला प्रहरी कार्यालय अगाडिको गेष्ट हाउस चौरमा जर्मन प्रविधिमा आधारित आल्मुनियम संरचनायुक्त डोम निर्माण गरिएको छ भने प्रधानमन्त्री तथा पार्टीका वरिष्ठ नेता बालेन्द्र शाह र पार्टी सभापति रवि लामिछानेले महाधिवेशन संयुक्त रूपमा उद्घाटन गर्ने छन् ।
महाधिवेशनको अन्तिम तयारी पूरा भएको छ भने अहिले उक्त स्थान रास्वपाको ब्यानर, प्लेकार्ड र तोरणले नव विवाहित दुलही झैँ सिगारिएको छ । आज दिउँसो २ बजे उद्घाटन गर्न लागिएकाे महाधिवेशनमा भाग लिन देशविदेशका प्रतिनिधिहरु भरतपुर आउन थालेका छन् ।
देशविदेशका प्रतिनिधिहरु भरतपुर आउन थालेकाे र प्रतिनिधिहरूलाई स्वागत गर्न ठाउँठाउँमा स्वागत गेट निर्माण गरिएकाे छ । महाधिवेशनमा आउने सवारीसाधनलाई पार्किङकाे व्यवस्थापन मिलाउँदै ट्राफिक व्यवस्थापन सहज बनाउन ड्रोनद्वारा अनुगमन गरिने बताइएकाे छ ।
महाधिवेशनमा विद्युतीय प्रणालीमार्फत मतदान गराइने र प्रतिनिधिहरूले विद्युतीय उपकरणमा उम्मेदवारको नाम र फोटोमा स्पर्श गरेर मतदान गर्ने व्यवस्था मिलाइएको छ । पहिलो चरणमा १ जना सभापति र ९९ जना केन्द्रीय सदस्यका लागि निर्वाचन हुनेछ भने निर्वाचित सदस्यबाट पदाधिकारीहरूको निर्वाचन गरिने तयारी रहेकाे छ ।
