आज साउन ४ गते साउन महिनाको पहिलो सोमबार पशुपतिनाथ मन्दिरलगायत देशभरका शिवालयमा आज बिहानैदेखि दर्शनार्थीको भिड लागेको छ । दर्शनार्थीका लागि पशुपतिनाथकाे चारै ढोका बिहान ३ बजेदेखि नै खोलिएको थियाे ।
पशुपति क्षेत्र विकास कोषका सदस्य सचिव तीर्थ श्रेष्ठका अनुसार साउने झरीको समेत वास्ता नगरी भक्तजन बिहानैदेखि मन्दिरमा भिड लागेको बताइएकाे छ । पशुपतिनाथको दर्शनमा आउने श्रद्धालु भक्तजनको सहज, सुरक्षित तथा व्यवस्थित दर्शन तथा विशेष पूजा व्यवस्थापनको व्यवस्था मिलाइएको पनि श्रेष्ठले जानकारी गराएका छन् ।
यसवर्ष पदाधिकारीको नियुक्तिमा ढिलाइ र कोषमा जनशक्तिकाे कमि भएकाले आवश्यकताअनुसार काम गर्न नसकिएको बताउँदै दर्शन व्यवस्थापनलाई थप प्रभावकारी, सुरक्षित र व्यवस्थित बनाउन कोषका सबै पदाधिकारी, कर्मचारीका साथै मन्दिर पहरा गण, नेपाल प्रहरी, सशस्त्र प्रहरी बल, नेपाली सेना, ट्राफिक प्रहरी, काठमाडौँ महानगर प्रहरी र विभिन्न धार्मिक तथा सामाजिक संघ–संस्थाको पनि विशेष सेवा एवं सहभागिता रहने बताइएकाे छ ।
पशुपतिनाथ मन्दिरमा भक्तजनलाई सहज, सुरक्षित, मर्यादित र व्यवस्थित गर्न व्यवस्था मिलाइएको छ भने बिहान ३ बजेदेखि खुलेका मन्दिरका चार ढोका बेलुका आरतीपछि ८ बजेसम्म भक्तजनका लागि खुला गर्ने गरी तयारी भएको छ ।
विशेष पूजा बिहान साढे ८ बजेदेखि मध्याह्न १२ बजेसम्म मात्र हुने बताइएकाे छ । मन्दिर प्रवेश गर्न चार वटा लाइनको व्यवस्था गरिएको छ र बिहानैदेखि भक्तजन आए पनि लाइन भने लामो नभएको कोषले जनाएको छ । पशुपति क्षेत्रमा दर्शनार्थीका लागि प्राथमिक उपचारलगायत अत्यावश्यक सबै व्यवस्था मिलाइएको पनि काेषले जनाएकाे छ ।
आज साउनकाे पहिलाे साेमबार पशुपतिनाथसँगै राजधानीका गोकर्णेश्वर, नागेश्वर, डोलेश्वर, वसन्तपुर दरबार क्षेत्रको सानो पशुपतिनाथ भनेर चिनिने मक्खन महादेवलगायत राजधानीका ठूलासाना सबै शिव मन्दिरमा भक्तजनको लाइन लागेको छ ।
