पर्साको वीरगञ्जमा लागू गरिएको निषेधाज्ञा आजदेखि पूर्ण रूपमा हटाइएको छ । सुरक्षा अवस्थामा सुधार आएपछि निषेधाज्ञा आज आइतबारदेखि पूर्ण रूपमा हटाइएको हाे ।
जिल्ला प्रशासन कार्यालय पर्साले समग्र सुरक्षा स्थितिको समीक्षा गर्दै निषेधाज्ञा हटाउने निर्णय गरेको बताइएकाे छ । प्रमुख जिल्ला अधिकारी भोला दाहालका अनुसार साउन १४ गतेदेखि दैनिक साँझ ५ बजेदेखि बिहान ६ बजेसम्म लागू गरिएकाे निषेधाज्ञा आवश्यक नरहेको निष्कर्ष सहित हटाइएकाे हाे ।
पछिल्ला दिनहरूमा जुलुस, प्रदर्शन र हुलदंगाका घटनाहरू साम्य हुँदै गएपछि प्रशासनले निषेधाज्ञा हटाएकाे हो । आन्दोलन र प्रतिबन्ध हटेसँगै वीरगञ्जको जनजीवन पुनः सामान्य बन्दै गएको छ ।
उता सिरहाको गोलबजार घटनाका पीडित पक्ष र सरकारबीच आठबुँदे सहमति जुटेसँगै मृतकको अन्त्येष्टि प्रक्रिया अघि बढेको छ । सहमति पछि आन्दोलनरत हिन्दू समाज तथा विभिन्न हिन्दूवादी संघसंस्थाहरूले आफ्ना सम्पूर्ण विरोधका कार्यक्रमहरू स्थगित गरेका छन् ।
सप्तरी जिल्लामा भने कर्फ्यु कायमै राखिएकाे सप्तरी जिल्ला प्रशासन कार्यालय राजबिराजले जनाएकाे छ । अत्यावश्यक सामग्री खरिद बिक्रीका लागि बिहान ७ देखि ११ बजेसम्म कर्फ्यु खुकुलो पारेको र त्यसपछि ११ बजेदेखि कर्फ्यु निरन्तर लागू हुने भएकाले तोकिएको समयपछि कर्फ्यू पूर्ण रूपमा पालना गर्न र शान्ति सुरक्षा कायम राख्न प्रशासनले आग्रह गरेको छ ।
