सर्लाही, धानबालीका लागि आवश्यक पर्ने रासायनिक मलको अभावले सर्लाहीका किसान गम्भीर समस्यामा परेका छन्।
धान रोप्न बाँकी रहेका किसानले डीएपी र रोपाइँ सकिएका खेतका लागि युरिया मल नपाउँदा खेतीपाती प्रभावित बनेको छ।
सरकारले कृषि सामग्री कम्पनी र साल्ट ट्रेडिङ मार्फत अनुदानको मल वितरण गरिरहेको भएपनि मागअनुसार आपूर्ति हुन नसक्दा किसानले बिहानैदेखि लाइन बस्नुपरेको छ।
धेरै स्थानमा घण्टौँ पालो कुरेर पनि किसान रित्तै घर फर्किन बाध्य भएका छन्।
कविलासी नगरपालिका–६, जमुनिया मा युरिया मल नपाएपछि आक्रोशित किसानले वडा कार्यालय नै घेराउ गरेका छन्।
वडाध्यक्ष पुरुषोत्तम राय का अनुसार वडामा १४८ बोरा मल मात्र उपलब्ध हुँदा सयौँ किसानको माग पूरा गर्न नसकिएको हो।
उनले सीमित परिमाणमा आएको मल आलोपालो वितरण गर्ने प्रयास गरिए पनि किसानबीच विवाद बढेपछि केही मलसमेत वितरण गर्न नसकी डिलरको गोदाममा सुरक्षित राखिएको जानकारी दिए।
यस्तै, ईश्वरपुर नगरपालिका–१२, घारीबथान स्थित महिला साना किसान कृषि सहकारी संस्थामा पनि मल लिन किसानको ठूलो भीड लागेको थियो।
स्थानीय किसान रामशरण खड्का का अनुसार केहीले आधा बोरा मल पाए पनि अधिकांश किसान खाली हात फर्किनुपरेको छ।
यस वर्ष पर्याप्त वर्षा भएपछि अधिकांश किसानले एकै समयमा धान रोपेपछि मलको माग एकैचोटि बढेको र त्यसअनुसार आपूर्ति हुन नसक्दा समस्या चर्किएको किसानहरूको भनाइ छ।
अनुदानको मल सहज रूपमा नपाएपछि किसान कालोबजारीबाट भारतीय मल महँगो मूल्यमा किन्न बाध्य भएका छन्।
बागमती नगरपालिका–३, जिरायत का किसान सञ्जय महतो ले करिब एक हजार रुपैयाँ पर्ने एक बोरा मल दुई हजार पाँच सय रुपैयाँ तिरेर खरिद गर्नुपरेको गुनासो गरे।
उनले डेढ बिघा धान खेतीका लागि पाँच बोराभन्दा बढी मल आवश्यक भए पनि महँगो मूल्यमा किनेर खेती धान्नुपरेको बताए।
मल वितरणका क्रममा भीड नियन्त्रण गर्न कतिपय स्थानमा प्रहरी परिचालन गर्नुपर्ने अवस्था समेत सिर्जना भएको छ।
कृषि सामग्री कम्पनी लिमिटेड, नवलपुर सर्लाहीका कार्यालय प्रमुख सरोज खनालले वीरगन्जबाट मल आउने क्रममा ढुवानी ढिलाइ भएकाले अस्थायी अभाव देखिएको बताए।
उनका अनुसार हाल प्राप्त भएको सबै मल डिलरमार्फत वितरण भइसकेको छ र एक–दुई दिनभित्र थप मल आइपुगेपछि नयाँ कोटा अनुसार वितरण सुरु गरिनेछ।
किसानहरूले भने धानबालीको संवेदनशील समयमा मल अभाव दोहोरिन नदिन सरकारले समयमै पर्याप्त आपूर्ति सुनिश्चित गर्नुपर्ने माग गरेका छन्।
