काठमाण्डू, करिब पाँच महिनापछि स्वदेश फर्किएका पूर्वप्रधानमन्त्री एवं नेपाली कांग्रेसका पूर्वसभापति शेरबहादुर देउवाको आगमनसँगै कांग्रेसभित्र राजनीतिक गतिविधि थप चलायमान हुने देखिएको छ।
देउवा बिहीवार दिउँसो साढे १२ बजे काठमाडौंस्थित त्रिभुवन अन्तर्राष्ट्रिय विमानस्थलमा अवतरण गरेका हुन्। उनको स्वागतका लागि कांग्रेसका नेता, कार्यकर्ता तथा शुभेच्छुक विमानस्थल पुगेका थिए।
विमानस्थलमा देउवालाई कांग्रेसका निवर्तमान कार्यवाहक सभापति पूर्णबहादुर खड्का र राष्ट्रिय भेला आयोजक समितिका संयोजक डा. शशांक कोइराला लगायतका नेताले स्वागत गरेका थिए।
विमानस्थलबाट बाहिरिने क्रममा देउवाले गाडीको सनरूफबाट हात हल्लाउँदै उपस्थित कार्यकर्ता तथा शुभेच्छुकलाई अभिवादन गरेका थिए।
उनको स्वागतमा विमानस्थल परिसरमा कांग्रेस कार्यकर्ताको उल्लेख्य उपस्थिति देखिएको थियो।
देउवा काठमाडौं फर्किएसँगै उनलाई कार्यकर्ताले सवारी स्कर्टिङसहित महाराजगञ्जस्थित निवाससम्म पुर्याउने तयारी गरेका छन्।
यसैबीच, कांग्रेसको इतर समूहले आयोजना गर्न लागेको राष्ट्रिय कार्यकर्ता भेलालाई देउवाले शुक्रवार सम्बोधन गर्ने कार्यक्रम रहेको बताइएको छ।
लामो समयपछि पार्टीका नेता तथा कार्यकर्तामाझ प्रत्यक्ष उपस्थित हुन लागेका देउवाको सम्बोधनलाई कांग्रेसको आन्तरिक राजनीति र आगामी रणनीतिका दृष्टिले चासोका साथ हेरिएको छ।
देउवाको स्वदेश आगमनसँगै कांग्रेसभित्रको संगठनात्मक गतिविधि, नेतृत्वसम्बन्धी बहस तथा विभिन्न समूहबीचको राजनीतिक संवादले समेत गति लिने अपेक्षा गरिएको छ।
