जाजरकोटमा अविरल वर्षासँगैकाे पहिरोमा परी एक जनाको मृत्यु भएको छ । जिल्लाकाे भेरी नगरपालिका–२, रिसाङमा पहिरोमा परी ५२ वर्षीय केदार कार्कीको मृत्यु भएको हो ।
जाजरकोट जिल्ला प्रहरी कार्यालयका प्रहरी निरीक्षक सुधीरकुमार खड्काका अनुसार पहिरोमा परी सोही वडाका ५४ वर्षीय उमासिंह खत्री, ७० वर्षीय भीमबहादुर कार्की र ८७ वर्षीय रती खत्री बेपत्ता भएका छन् भने ९ जना घाइते भएका छन् ।
घाइतेमध्ये एकको नेपालगञ्ज नर्सिङ अस्पताल, दुई जनाको कोहलपुर मेडिकल कलेज, तीन जनाको स्थानीय डौरीकाँडा मेडिकल सेन्टरमा उपचार भइरहेको छ भने अन्य तीन जना उपचार गरेर घर फर्केकाे प्रहरीले जनाएकाे छ ।
पहिरोको जोखिमलाई दृष्टिगत गरी सो वडाका २ सय जनालाई त्रिभुवन आधारभूत विद्यालयको भवनमा स्थानान्तरण गरिएको छ । दुर्घटनास्थलमा नेपाल प्रहरी, सशस्त्र प्रहरी बल र नेपाली सेनाका जवान परिचालन गरिएकाे छ ।
