आजदेखि हिमाली जिल्ला मुस्ताङकाे ‘घरपझोङ जलवायु सम्मेलन २०८३’ सुरु हुँदैछ । कृषि, वन तथा पर्यावरणमन्त्री गीता चौधरीले दुई दिनसम्म सञ्चालन हुने उक्त सम्मेलनको उद्घाटन गर्ने कार्यक्रम रहेको छ ।
उक्त सम्मेलनमा सहभागी हुन देशभरका ४२१ स्थानीय तह र ३६ जिल्ला समन्वय समितिका जनप्रतिनिधिसहित दुई हजारभन्दा बढी अतिथि हिजै मुस्ताङ आइपुगिसकेका छन् ।
सम्मेलनलाई भव्य र व्यवस्थित बनाउन गाउँपालिकाका पाँचै वडाका गाउँ समाज, आमा समूह, युवा क्लब तथा स्थानीय संघसंस्थाहरू परिचालन गरिएको छ ।
सम्मेलनमा उपस्थति हुने सातै प्रदेशका महानगर, उपमहानगर, नगर र गाउँपालिकाका जनप्रतिनिधि तथा अतिथिहरूका लागि स्थानीय होटलहरूमा बस्ने प्रबन्ध मिलाइएको घरपझोङ गाउँपालिकाका प्रमुख प्रशासकीय अधिकृत भीमकुमार बस्नेतले जानकारी दिएका छन् ।
सम्मेलनमा सहभागीहरूका लागि बिहानको खाजा र दिउँसोको खाना सम्मेलनस्थलमै आमा समूहको टोलीले व्यवस्थापन गर्नेछ भने बेलुकीको खाना र बसाइ तोकिएका होटलहरूमा मिलाइएको गाउँपालिका उपाध्यक्ष जमुना थकालीले जानकारी गराएकाी छन् ।
सम्मेलनका अवसरमा मुस्ताङका सडक र बस्तीहरूलाई मौलिक कला, संस्कृति तथा ध्वजापतङ्गाले सजाइएको छ । भित्री तथा मुख्य सडकहरूमा सडक बत्ती जडान गरी झिलीमिली पारिनुका साथै स्वास्थ्यकर्मी, खानेपानी, इन्टरनेट, विद्युत्, सवारी पार्किङ र ट्राफिक व्यवस्थापनलाई समेत चुस्त बनाइएको बताइएकाे छ ।
जोमसोमस्थित कभर्डहलमा आयोजना हुने सम्मेलनस्थलमा जलवायु परिवर्तनको असरबारे जनचेतना फैलाउन २८ फिट उचाइको ‘रोइरहेको पृथ्वी’ को बेलुन आकृति राखिएको छ ।
त्यस्तै मुस्ताङका स्थानीय कृषि उत्पादनको प्रचारप्रसारका लागि ५० भन्दा बढी स्टलहरू राखिएको कृषि शाखा अधिकृत रोशन थकालीले बताए । दुई दिनसम्म सञ्चालन हुने सम्मेलन जलवायु परिवर्तनको असरसम्बन्धी विशेष घोषणापत्र जारी गर्दै सकिनेछ ।
