सम्भावित मौसमको अवस्था बारे जानकारी लिएर मात्र धान काट्न कृषकलाई आग्रह गरिएकाे छ । कृषि विकास कार्यालय धादिङले सम्भावित मौसमको अवस्थाको जानकारी लिएर मात्र धान काट्न तथा भित्र्याउन कृषकलाई आग्रह गरेको हाे ।
कार्यालयले जारी गरेको ‘धानबाली काट्ने तथा भित्र्याउने सम्बन्धी’ सूचनामा यही कात्तिक ११ देखि १५ गतेसम्म देशका विभिन्न स्थानमा हल्कादेखि भारी वर्षाको सम्भावना रहेको उल्लेख छ । साेहि अनुसार वर्षाबाट धानबालीमा क्षति हुन नदिन विशेष सावधानी अपनाउन कार्यालयले अनुरोध गरेको हाे ।
खेतमा पाकिसकेको धान मौसमको अवस्था हेरेर कात्तिक १५ गतेपछि मात्र काट्न कार्यालयले सुझाएको हाे । तत्काल भित्र्याउन नसकिने धान भने मौसममा सुधार आएपछि मात्र काट्ने गरी समय मिलाउन कृषकलाई आग्रह गरिएको छ ।
त्यसैगरि धान नपाकेकाे खेतमा कुलो वा नाली काटेर तत्काल पानी निकासको व्यवस्था गर्न समेत कार्यालयले अनुरोध गरेको छ । हावाहुरी वा पानीका कारण धान ढलेको भए बाला पानीमा डुब्न नदिन मुठो पारेर ठड्याउने वा अग्लो ठाउँमा राख्ने प्रयास गर्न कार्यालयले कृषकलाई आग्रह गरेको छ ।
