एजेन्सी, लेबनानमा इजरायल र हिजबुल्लाहबीच जारी भीषण आक्रमणका बीच त्यहाँ तैनाथ नेपाली शान्ति सैनिक हालसम्म सुरक्षित छन् ।
इजरायल र हिजबुल्लाहबीचको रकेट, ड्रोन र मिसाइल हानाहानपछि उत्पन्न तनावपूर्ण परिस्थितिमा पनि नेपाली शान्ति सेना तैनाथ इलाका सामान्य अवस्थामा रहेको नेपाली सेनाले जनाएको छ ।
लेबनानमा तैनाथ ‘युनाइटेड नेसन्स इन्टेरिम फोर्स इन लेबनान’ (युनिफिल) अन्तर्गत ९,५३२ जना शान्ति सैनिकहरूमा करीब ८५० जना नेपाली सैनिक छन् ।
उनीहरूको मुख्य गण हेडक्वार्टर मेइसेज जाबलमा छ, जहाँबाट अरु ६ स्थानमा शान्ति सैनिक युनिट परिचालन गरिएको छ ।
हिजबुल्लाहले बेरुतमा आफ्नो कमाण्डरको हत्या पछि इजरायलविरुद्ध आक्रामक आक्रमण सुरु गरेको हो ।
आइतबारमात्र हिजबुल्लाहले उत्तरी इजरायलमा सयौं मिसाइल प्रहार गरेको थियो ।
प्रत्याक्रमणस्वरूप इजरायलले जेट विमानद्वारा दक्षिणी लेबनानमा हिजबुल्लाहको अखडामा निशाना साँधिरहेको छ ।
त्यहाँ परिचालित नेपाली सेनाहरु सुरक्षित छन् । नेपाली सेनाका प्रवक्ता सहायक रथी गौरवकुमार केसीले हिजबुल्लाह र इजरायलबीचको आक्रमणबारे जानकारी पाएपछि नेपाली मिसनसँग नियमित सम्पर्क भइरहेको बताए ।
उनले भने, ‘हालसम्मको अवस्था हेर्दा गण हेडक्वार्टर तथा मातहत इलाकाको अवस्था जोखिममुक्त देखिन्छ ।’
यद्यपि, स्थिति गम्भीर बन्ने सम्भावनालाई ध्यानमा राख्दै युनिफिल मिसन हेडक्वार्टरले उच्च सतर्कता अपनाउन आदेश दिएको छ ।
लेबनानमा सन् १९५८ देखि नेपाली शान्ति सेना खटिँदै आएको छ ।
