आज कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशको हिमाली र पहाडी भूभागका थोरै भूभागका एक–दुई ठाउँमा मेघगर्जन र चट्याङसहित मध्यम वर्षा र हिमपातको सम्भावना रहेकाे छ । त्यस्तै लुम्बिनी र सुदूरपश्चिम प्रदेशका तराई भेगमा आज पनि गर्मिकाे सम्भावना रहेको मौसम पूर्वानुमान महाशाखाले जनाएको छ ।
भोलि देशका अरु ठाउँमा जस्तै पश्चिममा पनि पानी पर्ने सम्भावना रहेकाे छ भने पानी परेपछि पश्चिम तराईमा पनि गर्मी कम हुने बताइएकाे छ । त्यस्तै भोलि सबै प्रदेशका धेरै ठाउँमा मेघगर्जन र चट्याङसहित वर्षा र हिमपातको सम्भावना रहेको पनि महाशाखाले जनाएको छ ।
हिजो गण्डकी, बागमती र लुम्बिनी प्रदेशको थोरै ठाउँहरुमा तथा कोशी र मधेश प्रदेशको एक–दुई ठाउँमा मेघगर्जन हावाहुरी र चट्याङसहित मध्यमसम्मको वर्षा भएकाे थियाे भने उच्च पहाडि र हिमाली भेगमा हिमपात भएको थियो ।
त्यसैगरि देशका मध्य र पूर्वी क्षेत्रका धेरै ठाउँमा हिजो दिउँसो र राति पानी परेको थियाे भने पानी परेकाले गर्मी केही कम हुनुका साथै प्रदूषण पनि घटेर केही राहत मिलेको छ । उता पश्चिमका धेरै ठाउँमा भने वर्षा नभएकाले चर्को गर्मी कायमै रहेकाे महाशाखाले जनाएकाे छ ।
अहिले नेपालमा पश्चिमी र स्थानीय वायुको साथै पूर्वी भाग नजिक तल्लो वायुमण्डलमा रहेको न्यूनचापीय क्षेत्रको आंशिक प्रभाव रहेकाले याे हप्ताभरी बदली र वर्षा हुने महाशाखाले जनाएकाे छ ।
