नेपाली सेनाले सुकुम्बासीको विवरण मागेको भन्दै आलोचना भएपछि जंगी अड्डाले प्रष्टीकरण दिएको छ । सैनिक जनसम्पर्क तथा सूचना निर्देशनालयले आज विज्ञप्ति जारी गर्दै विपद् पूर्वतयारीका लागि सुकुम्बासीको विवरण संकलन थालिएको बताएको हो ।
विपद्को समयमा हुनसक्ने बाढी, पहिरो, डुबान र नदी कटानमा आफ्ना स्थानीय युनिट तैनाथ गरी उद्धार, राहत वितरण र पुनःस्थापना कार्य सहज बनाउन विवरण संकलनको काम भएको सेनाको भनाइ छ ।
विज्ञप्तिमा भनिएको छ, ‘सामाजिक सञ्जाल तथा सञ्चारमाध्यमहरुमा नेपाली सेनाले सुकुम्बासीहरुको विवरण माग गरेको सम्बन्धमा विभिन्न खबरहरु प्रकाशन र प्रशारण भइरहेको सन्दर्भमा नेपाली सेनाका स्थानीय युनिटहरुले आआफ्नो जिम्मेवारी क्षेत्रमा हुनसक्ने विपद्का घटनाहरुमा सुरक्षा फौज तैनाथ भई उद्धार, राहत वितरण र पुनःस्थापनाका कार्यहरुलाई सहज बनाउने उद्देश्यका साथ सम्भावित जोखिम नक्साङ्कन गर्नका लागि तथ्याङ्क अद्यावधिक गर्ने कार्य गरिएको सबैमा जानकारी गराउँदछौं ।’
