दलालसँगको साँठगाँठमा नेपालीलाई अवैध ढंगले विदेश पठाएर करोडौं कुम्ल्याएको भिजिट भिसा प्रकरणका सरकारी साक्षीविरुद्ध भ्रष्टाचार मुद्दा दायर भएको छ । अदालतमा बयान फेरेको भन्दै अख्तियार दुरुपयोग अनुसन्धान आयोगले साक्षी स्याङ्जाको फेदीखोला गाउँपालिका–३, का दिपक थापाउपर मुद्दा दर्ता गरेको हो ।
भिजिट भिसा काण्डमा अख्तियारले गत मंसिर २५ गते त्रिभुवन अन्तर्राष्ट्रिय विमानस्थलस्थित अध्यागमन कार्यालयका तत्कालिन प्रमुख सहसचिव तीर्थराज भट्टराईसहित सात व्यक्ति र दुई कम्पनीउपर भ्रष्टाचार र सम्पत्ति शुद्धिकरणसम्बन्धी मुद्दा चलाएको थियो ।
उनीहरूको आपसी मिलेमतोमा भिजिट भिसामा विदेश जाने नेपालीलाई दुःख, हैरानी दिई घुस–रिसवत लिनुका साथै बदनियत राखेर मानिस पठाइएको अख्तियारको ठहर छ । आयोगका अनुसार डिएमसी ट्राभल्स प्रालि पोखराका तत्कालिन मार्केटिङ अफिसर दिपक थापाको पनि त्यसमा संलग्नता भेटिएपनि अनुसन्धानमा सहयोग गरेकोले सजायमा पूर्ण छुट दिइएको थियो ।
तर, विशेष अदालतमा बकपत्रका क्रममा उनले आयोगका अनुसन्धान अधिकृतसमक्ष दिएको बयानभन्दा फरक गरेको अख्तियारको ठहर छ । अख्तियारले भ्रष्टाचार निवारण ऐन, २०५९ बमोजिम ३० लाख २० हजार रुपैयाँ कायम गर्दै उनलाई कैद र जरिवाना सजाय हुन मागदाबी गरेको छ ।
