फिफा विश्वकप २०२६ मा क्यानडाले कतारलाई आधा दर्जन गोल हानेको छ । भ्यान्कुभरको बीसी प्लेस स्टेडियममा सम्पन्न खेलमा घरेलु टोली क्यानडाले कतारमाथि ६–० को फराकिलो र जित दर्ता गरेको हो ।
राताे कार्ड पाएर ९ खेलाडीमा समेटिएको कतारलाई क्यानडाको यस एकपक्षीय जितमा क्यानडाका स्टार स्ट्राइकर जोनाथन डेभिडले उत्कृष्ट ह्याट्रिक गरेका थिए । क्यानडाले खेलको सुरुवाती मिनेटदेखि नै कतारलाई पूर्ण दबाबमा राखेको थियो ।
खेलको १६औँ मिनेटमा सायल लारिनले गोल गर्दै क्यानडाको खाता खोलेका क्यानाडाले त्यसपछि जोनाथन डेभिडले २९औँ मिनेट गोल गर्दै अग्रता कायम गरेकाे थियाे । कतारका होमाम अहमदले ३३औँ मिनेटमा रेडकार्ड खाँदै बाहिरिएपछि १० खेलाडीमा सीमित बन्यो। पहिलो हाफको इन्जुरी समयमा डेभिडले व्यक्तिगत दोस्रो गोल गर्दै पहिलो हाफमै टोलीलाई ३–० को बलियो स्थितिमा पुर्याए ।
कतारका असिम मादिबो ५१औँ मिनेटमा अर्को रेडकार्ड खाँदै मैदान बाहिरिएपछि दोस्रो हाफमा कतार ९ खेलाडीमा समेटियो । दोस्रो हाफमा पनि क्यानडाको गोल गर्ने क्रम रोकिएन र ६४औँ मिनेटमा नेथन सालिबाले टोलीका लागि चौथो गोल थपे। खेलको ७५औँ मिनेटमा कतारका मोहमद मनइले आत्मघाती गोल गरेपछि क्यानडा ५–० ले अघि बढ्यो ।
खेलको निर्धारित समय सकिनै लाग्दा जोनाथन डेभिडले आफ्नो व्यक्तिगत तेस्रो गोल गर्दै ह्याट्रिक पूरा गर्दा क्यानडाले ६–० को विशाल जित हात पार्दै क्यानडा समूह बीको शीर्ष स्थानमा उक्लिएको छ ।
