नेपालमै डिजाइन र उत्पादन गरिएको विद्युतीय स्कुटर ‘यात्री पी-२’ले स्वदेशी उत्पादनप्रति राष्ट्रिय आत्मविश्वास जगाएको बताइएकाे छ । अर्थमन्त्री डा. स्वर्णिम वाग्लेले स्वदेशी उत्पादन विद्युतीय स्कुटर ‘यात्री पी-२’ले स्वदेशी उत्पादनप्रति राष्ट्रिय आत्मविश्वास जगाएको बताएका हुन् ।
सिप्रदी यात्री कम्पनीले निर्माण गरेको स्कुटरकाे सार्वजनिक गर्दै अर्थमन्त्री वाग्लेले नेपालमै विश्वस्तरीय उत्पादन सम्भव रहेको सन्देश यात्रीले दिएको बताएका छन् । उनले स्कुटरको डिजाइन बुढानीलकण्ठमा गरिएको र धादिङमा उत्पादन हुने उल्लेख गर्दै स्वदेशमै डिजाइनदेखि उत्पादनसम्मको काम हुनु सकारात्मक भएको समेत उल्लेख गरेका छन् ।
सार्वजनिक कार्यक्रममा अर्थमन्त्री वाग्लेले यात्री पी-२ ले अन्तर्राष्ट्रिय बजारमा समेत प्रतिस्पर्धा गर्न सक्ने गरी आफ्नो गुणस्तर स्थापित गरोस् भन्ने अपेक्षा व्यक्त गरेका थिए । उनले इटालीका प्रख्यात ब्रान्डभन्दा पनि अब्बल बन्ने र विश्व बजारमा विस्तार हुन सक्ने उत्पादनका रूपमा विकास होस् भन्दै शुभकामना समेत दिएका थिए ।
अर्थमन्त्री वाग्लेले स्वदेशमै निर्माण भएको विद्युतीय स्कुटरको उत्पादन तथा बजार विस्तारका लागि सरकारले आवश्यक सहयोग र संरक्षण गर्ने प्रतिबद्धतासमेत व्यक्त गरेका छन् ।
