धनगढी उपमहानगरपालिकाले अत्यधिक गर्मी बढेपछि चार दिनका लागि विद्यालयमा बिदा दिने निर्णय गरेको छ । केही दिनदेखि बढेकाे गर्मीका कारण सामुदायिक तथा संस्थागत विद्यालय चार दिनका लागि बिदा दिने निर्णय गरेको हाे ।
बढ्दो गर्मीका कारण विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई मध्यनजर गर्दै उपमहानगरले सामुदायिक तथा संस्थागत विद्यालयमा बिदा दिने निर्णय गरेको हो । जसअनुसार असार ९ गतेदेखि १२ गतेसम्म पठनपाठन स्थगित गर्ने निर्णय भएको उपमहानगरपालिका, शिक्षा शाखाद्वारा जारी सूचनामा उल्लेख गरिएकाे छ ।
अत्याधिक गर्मीका कारण विद्यालयमा अध्ययनरत विद्यार्थीहरूमा विभिन्न स्वास्थ्य समस्या देखिन सक्ने सम्भावना रहेकाले त्यसको प्रतिकूल असरबाट बच्न र सुरक्षित रहन धनगढीभित्रका सम्पूर्ण सामुदायिक तथा संस्थागत विद्यालयमा बिदा दिइएकाे हाे ।
जारी सूचना अनुसार वर्षे तथा हिउँदे बिदाबाट मिलान हुने गरी बिदा व्यवस्था गरिएको छ । उपमहानगरले शिक्षक, विद्यार्थी र अभिभावकलाई गर्मी तथा लु (तातो हावा)बाट बच्नका लागि सावधानीका उपायहरू अवलम्बन गर्न पनि अनुरोध गरेको छ ।
