भक्तपुर मोडेल अस्पतालले बिरामीलाई सहुलियतपूर्ण स्वास्थ्य सेवा उपलब्ध गराउने उद्देश्यले एक सम्झौता गरेको छ । अस्पताल सञ्चालक भुवन श्रेष्ठ र काभ्रे जिल्लाका पूर्वमन्त्री सूर्यमान दोङको प्रस्तावबमोजिम सम्झौता भएको हो ।
उनीहरुले सम्झौतापत्रमा हस्ताक्षर गर्दै काभ्रेपलाञ्चाेक जिल्लाका बिरामीलाइ उपचार खर्चमा ३० प्रतिशत छुट दिने सम्झाैता गरेका हुन् । सम्झौताअनुसार दोङमार्फत सिफारिस भई उपचार गराउन अस्पताल आउने बिरामीलाई ३० प्रतिशत छुट प्रदान गरिने छ ।
छुट सुविधा लिन आउने बिरामीले आफ्नो नागरिकता, राष्ट्रिय परिचयपत्र वा अन्य आवश्यक प्रमाणपत्रको प्रतिलिपि पेश गर्नुपर्नेछ । यस्तै, १६ वर्षमुनिका बालबालिकाको हकमा जन्मदर्ता प्रमाणपत्रको प्रतिलिपि आवश्यक पर्नेछ भने उक्त सम्झौताको अवधि दुई वर्ष रहनेछ ।
दुवै पक्षको आपसी सहमतिमा सम्झौता थप गर्न सकिने व्यवस्था पनि गरिएको छ । अस्पतालले यस किसिमको सहकार्यले आर्थिक रूपमा कमजोर तथा आवश्यकतामा रहेका बिरामीलाई गुणस्तरीय स्वास्थ्य सेवा पहुँचमा सहयोग पुग्ने विश्वास लिएको छ ।
