वीरगञ्जकाे नारायणी अस्पतालका चिकित्सक तथा स्वास्थ्यकर्मीमाथि भएको आक्रमणको विरोधमा आज देशभरका अस्पतालहरूमा आकस्मिकबाहेकका सम्पूर्ण सेवा बन्द भएका छन् ।
गत शनिबार साउन ९ गते नारायणी अस्पतालमा उपचारका क्रममा एक बिरामीको मृत्यु भएपछि आक्रोशित समूहले चिकित्सक तथा स्वास्थ्यकर्मीमाथि कानुनी दायरा विपरीत हातपात गरेका थिए । उक्त आक्रमणका क्रममा डा. प्रमोद राम गम्भीर घाइते भएका छन् भने उनको टाउकोमा गहिरो चोट लागेको छ । स्वास्थ्यकर्मीको सुरक्षा र आत्मसम्मानमाथि लगातार आक्रमण भइरहेको भन्दै चिकित्सकहरू कडा आन्दोलनमा उत्रिएका हुन् ।
उक्त घटनाको विरोधस्वरूप नेपाल चिकित्सक संघले आज एक विज्ञप्ति जारी गर्दै देशैभरका सरकारी तथा निजी अस्पताल, मेडिकल कलेज र स्वास्थ्य संस्थामा आकस्मिक सेवाबाहेकका सम्पूर्ण नियमित स्वास्थ्य सेवाहरू पूर्ण रूपमा बहिष्कार गर्ने निर्णय गरेको जनाएको छ । संघले चिकित्सक तथा स्वास्थ्यकर्मीको सुरक्षाको ग्यारेन्टी गर्न राज्य गम्भीर हुनुपर्नेमा पनि जोड दिएको छ।
संघले वीरगञ्जको उक्त घटनामा प्रत्यक्ष रूपमा संलग्न दोषीलाई तत्काल कानुनको दायरामा ल्याएर कडा कारबाही गर्न सरकारसँग जोडदार माग गरेको छ । स्वास्थ्यजस्तो संवेदनशील क्षेत्रमा काम गर्ने चिकित्सक तथा स्वास्थ्यकर्मीहरूले भयरहित वातावरणमा सेवा दिने अवस्था सिर्जना नभएसम्म आन्दोलनका कार्यक्रमहरू जारी रहने पनि संघले जनाएको छ ।
