धादिङ, धादिङको गजुरी नजिकै चालिसेमा खसेको सुक्खा पहिरो हटाइएपछि नागढुंगा–मुग्लिन सडकखण्डमा दुईतर्फी यातायात सञ्चालनमा आएको छ।
सोमबार बिहान करिब पौने ६ बजे खसेको ठूलो पहिरोका कारण पृथ्वी राजमार्ग पूर्ण रूपमा अवरुद्ध भएको थियो। पहिरोका कारण सडकको दुवैतर्फ सवारीसाधनको लाम लागेको थियो।
सडक आयोजनाको डोजर प्रयोग गरी पहिरो पन्छाएपछि राजमार्ग खुलाइएको जिल्ला प्रहरी कार्यालय धादिङले जनाएको छ।
करिब छ घण्टासम्म रोकिएका सवारीसाधन सडक खुलेसँगै गन्तव्यतर्फ अघि बढेका छन्।
वर्षायाममा राजमार्गका विभिन्न स्थानमा पहिरो खस्ने जोखिम रहेकाले यात्रुलाई सावधानी अपनाउन आग्रह गरिएको छ।
