पृथ्वी राजमार्गको कृष्णभीरमा सडक भासिएपछि उपत्यका बाहिरबाटै ग्यास भरेर राजधानी ल्याइने भएको छ । उक्त सडक मार्फत ग्यास बोकेका बुलेट जान नसक्ने भएपछि उपत्यका र छिमेकी जिल्लाकाे ग्यास उद्योगले उपत्यका बाहिर भरेर ग्यासका सिलिण्डर गाडीमा लैजाने भएका हुन् ।
नेपाल एलपी ग्यास उद्योग संघका अध्यक्ष देवान चन्दका अनुसार नेपाल आयल निगमले उद्योगीलाई राजधानी बाहिर ग्यास भर्न अनुमति दिएको छ । उपत्यका र छिमेकी जिल्लामा रहेका १६ वटा उद्योगले बारा, पर्सा, चितवन, मकवानपुर, नवलपरासी (बर्दघाट–सुस्तापूर्व) जिल्लाका उद्योगसँग समन्वय गरी ग्यास भर्ने बताइएकाे छ ।
संघका अध्यक्ष चन्दका अनुसार उपत्यका र छिमेकी जिल्लामा मात्रै कुल खपतको ४० प्रतिशत बढी ग्यास आवश्यक रहेको बताउँछन् ।
संघका सदस्य तथा बाबा ग्यासका सञ्चालक विमल कालाखेतीले कृष्णभीरको बाटो नखुलेसम्म अन्य उद्योगमा ग्यास भरेर वैकल्पिक बाटोबाट काठमाडौँ लगिने बताए । त्यसरी भरिएका ग्यास त्रिभुवन राजपथसहितका सडकबाट काठमाडौँ लगिने उनकाे भनाइ रहेकाे छ ।
अहिले राजधानी बाहिरका उद्योगमा ग्यास भर्ने काम सुरु भइसकेकाले उपत्यका र छिमेकी जिल्लामा ग्यास अभाव नहुने भएकाले जगेडा नराख्न पनि उपभाेक्तलाइ अनुराेध गरिएकाे छ ।
श्री ग्यासले बाबा, श्रीकृष्णले साइबाबा, श्रीरामले जानकी, नेपाल ग्यासले नेपाल गण्डकी, एभरेष्ट र सुगमले साहारा उद्योगमा ग्यास भर्न सुरु गरिसकेको पनि कालाखेतीले जानकारी दिएका छन् । साथै अन्य उद्योगले पनि राजधानी बाहिरका उद्योग वा अन्य उद्योगसँग समन्वय गरेर ग्यास भर्न सुरु गरेको उनको भनाइ रहेकाे छ ।
