नागढुंगा-नौबिसे सडक खण्ड अन्तर्गत नागढुंगा नजिकै पातले वनमा सडक भासिएको छ । धादिङ सडक विभागका अनुसार पातले वनमा सडक भासिएको हाे ।
सडक विभागका इन्जिनियर अर्जुन प्रसाद अर्यालका अनुसार सडक भासिएपछि गाडी एकतर्फी सञ्चालन गरिएको छ । सडक भासिएपछि पेट्रोलियम पदार्थ बोकेका गाडीहरूलाई मात्रै यो रुटमा चल्न दिइएको पनि अर्यालले जानकारी दिएका छन् ।
उक्त रुट भएर आउने अन्य गाडीहरूलाई भने सुरुङमार्गबाट पठाउने तयारी भइरहेको बताइएकाे छ । सडकको वाल पुरानो भएका कारण सडक भासिएको हुन सक्ने बताउँदै अर्यालले भने, ‘सडकको वाल धेरै पुरानो थियो । पुरानै भएका कारण वाल भत्किएपछि सडक भासिएको हुन सक्छ । तर के कारणले सडक भासिएको भन्नेबारे प्राविधिक टोलीले अध्ययन गरेपछि मात्रै थाहा हुन्छ ।’
अहिले प्राविधिक टोलो सडक विभागबाट सडक भासिएको ठाउँमा गइसकेको पनि अर्यालले बताएका छन् ।
