गत भदाै १० गते बुधबार रसुवाकाे भाेटेकाेशीमा गएकाे बाढीमा परि निधन भएका १ हजार १ सय १४ जनाको शव फेला परेको बताएको छ । राष्ट्रिय विपद् जोखिम न्युनिकरण तथा व्यवस्थापन प्राधिकरणका अनुसार उक्त बाढीमा मृत्यु भएका १ हजार १ सय १४ जनाको शव फेला परेको हाे ।
प्राधिकरणले बाढी गएकाे एक साता पछि अाज बिहान ९ बजेसम्मको तथ्यांकअनुसार, बाढी र पहिरोजन्य विपद्मा परी हालसम्म मृत्यु हुनेको संख्या १ हजार १ सय १४ पुगेको जनाएकाे छ । प्राधिकरणकाअनुसार बाढी र पहिरो परी निधन भएकाहरू चितवनमा सबैभन्दा बढी ३ सय ४८ जनाको शव फेला परेको छ ।
नवलपरासी पूर्वमा २ सय १७, नवलपरासी पश्चिममा १ सय ९०, नुवाकोटमा १ सय ५५, गोरखामा ६६, धादिङमा ५९, रसुवामा ४१ र तनहुँमा ३८ जनाको शव फेला परेको बताइएकाे छ । फेला परेका शवमध्ये हालसम्म ९५ जनाको मात्र सनाखत भई आफन्तलाई बुझाइएको पनि प्राधिकरणले जनाएकाे छ ।
उक्त विपद्मा हालसम्म २९२ जना घाइते भएका छन् । जसमध्ये १८२ जना उपचारपछि अस्पतालबाट डिस्चार्ज भइसकेका छन् भने अन्यको उपचार भइरहेकाे छ । घाइतेहरूको उपचारका लागि नेपाली सेनाले २ हजार ९ सय १५ र सशस्त्र प्रहरी बलले १ हजार १ सय ५५ जनालाई स्वास्थ्य सेवा प्रदान गरेको छ ।
उक्त विनाशकारी बाढीका कारण करिब ३ हजार ९ सय १६ जना अझै सम्पर्कविहीन छन् भने बेपत्ता हुनेहरूमा सरकारी कर्मचारी, सुरक्षाकर्मी, जनप्रतिनिधि, विदेशी नागरिक, पर्यटक तथा स्थानीय बासिन्दा र जलविद्युत आयोजनामा कार्यरत श्रमिकहरू रहेका छन् । प्राधिकरणका अनुसार हालसम्म ११ हजार ९ सय ९३ जनाको सफल उद्धार गरिएको छ ।
सरकारले उद्धार कार्यका लागि २१,३१४ सुरक्षाकर्मी परिचालन गरेको छ, जसमा नेपाली सेनाका ९ हजार १ सय ९९, नेपाल प्रहरीका ७ हजार ९ सय १२ र सशस्त्र प्रहरी बलका ४ हजार २ सय ३ जना रहेका छन् । नेपाली सेनाले ६ सय २२ पटक हवाई उडान गरी ४ हजार ९१ नेपाली र २ सय ७३ विदेशी नागरिकको उद्धार गरेको बताइएकाे छ ।
त्यसैगरि ३ हजार ४ सय ५३ जनालाई विभिन्न जिल्लाका होल्डिङ सेन्टरहरूमा राखिएको छ भने प्रभावित जिल्ला र पालिकाहरूका लागि सरकारले राहत रकम निकासा गरेको छ । जसमा रसुवा र नुवाकोट जिल्लालाई १/१ करोड रुपैयाँ तथा धादिङलाई ५० लाख रुपैयाँ उपलब्ध गराइएको छ । यसका साथै प्रभावित १५ वटा पालिकाका लागि थप ६ करोड ७५ लाख रुपैयाँ निकासा गरिएको प्राधिकरणले जनाएको छ ।
राहत सामग्रीतर्फ ३७ ट्रक र ३७ बोलेरोमार्फत खाद्यान्न तथा गैर–खाद्यान्न सामग्री प्रभावित क्षेत्रमा पुर्याइएको छ । दुर्गम क्षेत्रहरूमा ७७ पटक हेलिकप्टर उडानमार्फत राहत सामग्री ढुवानी गरिएको छ भने प्रभावित क्षेत्रमा अत्यावश्यक इन्धन ४९ हजार लिटर डिजेल, १९ हजार लिटर पेट्रोल र १३ हजार लिटर हवाई इन्धन मौज्दात राखिएकाे छ ।
बाढीका कारण सञ्चार क्षेत्रमा परेको असरलाई मध्येनजर गर्दै नेपाल टेलिकमका क्षतिग्रस्त ११० वटा टावरमध्ये सबै सञ्चालनमा ल्याइएको छ । त्यसैगरि एनसेलका ७८ क्षतिग्रस्त टावरमध्ये ७५ वटा सञ्चालनमा आइसकेकाे छ भने बाँकी टावरहरूको मर्मत कार्य भइरहेकाे प्राधिकरणले जनाएको छ ।
