रामेछाप । रामेछापको सुनापति गाउँपालिकाले हालै रसुवा जिल्लामा गएको बाढी तथा पहिरोबाट प्रभावित पीडितहरूको राहत तथा उद्धारका लागि सरकारको राहत कोषमा दुई लाख रुपैयाँ सहयोग गर्ने निर्णय गरेको छ।
प्राकृतिक विपद्का कारण ठूलो मानवीय तथा भौतिक क्षति व्यहोर्नुपरेका रसुवाका बाढीपहिरो पीडितप्रति ऐक्यबद्धता जनाउँदै गाउँपालिकाले उक्त आर्थिक सहयोग उपलब्ध गराएको हो।
गाउँपालिका अध्यक्ष ठूलोकान्छा तामाङले विपद्को कठिन घडीमा एक स्थानीय तहले अर्को क्षेत्रका नागरिकप्रति मानवीय सहयोग गर्नु आफ्नो सामाजिक दायित्व भएको बताउनुभयो।
अध्यक्ष तामाङले भन्नुभयो, “प्राकृतिक विपद् सबैको साझा पीडा हो। रसुवाका दाजुभाइ तथा दिदीबहिनीहरूले दुःखद परिस्थिति भोगिरहेका बेला सुनापति गाउँपालिकाको तर्फबाट सानो भए पनि सहयोग पुर्याउने उद्देश्यले सरकारको राहत कोषमा दुई लाख ?पैयाँ उपलब्ध गराएका हौँ।”
उहाँले विपद्बाट प्रभावित नागरिकको राहत, पुनःस्थापना तथा पुनर्निर्माणका लागि सबै पक्ष एकजुट हुनुपर्नेमा जोड दिनुभयो।
सुनापति गाउँपालिकाले यस सहयोगमार्फत रसुवाका बाढीपहिरो पीडितप्रति सहानुभूति र ऐक्यबद्धता प्रकट गर्दै विपद्को समयमा आपसी सहयोग र मानवीय भावनालाई प्राथमिकता दिनुपर्ने सन्देश दिएको छ।
प्राकृतिक विपद्को पीडामा साथ दिँदै सुनापति गाउँपालिकाले गरेको यो सहयोग स्थानीय सरकारको मानवीय र सामाजिक उत्तरदायित्वको उदाहरणका रूपमा लिइएको छ।
