गाेरखाकाे चुमनुब्री गाउँपालिका–४ र २ भएर बग्ने थेराङ खोलाको बाढीले चार घर र एक पुल बगाएको छ । आज विहान आएको बाढीले जिल्लाको हिमाली भेगस्थित चुमनुब्री गाउँपालिका–४ र २ भएर बग्ने थेराङ खोलाले उक्त वितण्ड मच्चाएकाे हाे ।
बाढीले चुमनुब्री ४ स्थित नाम्रुङकानुर्वु ओङ्ग्याल (नुर्वु छिरिङ), उर्गेन छयोदेन, लाक्पा भुटी र दोर्जे ग्याल्जेनको घर बगाएको जिल्ला प्रहरी कार्यालयले जनाएको छ । बाढीबाट मानवीय क्षति भने नभएको कार्यालय प्रमुख प्रहरी नायव उपरीक्षक राजकुमार श्रेष्ठले जनाएका छन् ।
विहानकाे समयमा बाढी आएको थाहा पाएपछि स्थानीयवासीले भागेर ज्यान जोगाएका थिए भने बाढीले सोही ठाउँको झोलुङ्गे पुल पनि बगाएको बताइएकाे छ । पुल बाढीले लगेपछि मनास्लु पदयात्रामा गएका पर्यटक समस्यामा पर्ने जनाइएको छ ।
खोलाको मुहानी भेगतिर केही बेर थुनिएर लेदोसहित आएको बाढीले क्षति पुर्याएको सहायक प्रमुख जिल्ला अधिकारी नेत्रप्रसाद शर्माले जानकारी दिएका छन् । उक्त खोला बूढीगण्डकीसँग मिसिने हुँदा बूढीगण्डकीको तटीय क्षेत्रका बासिन्दालाई सचेत रहन समेत आग्रह गरिएको छ ।
