यहि भदाै १० गते भोटेकोशी नदीमा आएको विनाशकारी बाढीमा परि ज्यान गुमाउनेको संख्या १ हजार ३९२ पुगेको छ । प्रहरी प्रधान कार्यालय नक्सालले सार्वजनिक गरेको पछिल्लो अद्यावधिक विवरणअनुसार बाढीमा परेका ४ हजार ८९ जना सम्पर्कविहीन रहेका छन् ।
बाढी पछि फेला परेका शवहरूमध्ये ५४२ पुरुष, ३३६ महिला र ५१४ वटा आंशिक अंग मात्र रहेका छन् । हालसम्म फेला परेकामध्ये १०३ वटा शवको पहिचान भई आफन्तलाई हस्तान्तरण गरिसकिएको र बाँकी शवको पहिचान र सनाखतका लागि डिएनए परीक्षणलाई प्राथमिकताका साथ अगाडि बढाइएको प्रहरीले जनाएको छ ।
बाढीमा बेपत्ता भएका ४ हजारभन्दा बढी व्यक्तिहरूको खोजी तीव्र पारिएको छ भने बेपत्ता हुनेमा स्वदेशी नागरिकतर्फ २ हजार ९०७ पुरुष र ५७२ महिला रहेका छन् । त्यसैगरि विदेशी नागरिकतर्फ २७२ पुरुष र ३२८ महिला सम्पर्कविहीन रहेका छन् ।
विनाशकारी विपदपछि चालिएको उद्धार कार्यका क्रममा हालसम्म ९ हजार २८७ जना घाइतेको सकुशल उद्धार गरिएको छ । जसमा ६ हजार ४०७ पुरुष, २ हजार ८३० महिला र पहिचान नखुलेका ५० जना रहेका छन् । उद्धार गरिएकामध्ये २ हजार ७८१ जनालाई सुरक्षित रूपमा होल्डिङ सेन्टरहरूमा राखिएको छ ।
बाढीबाट ठूलो मानवीय क्षति भएकाले प्रभावित क्षेत्रमा बेपत्ताको खोजी, उद्धार, शवको पहिचान र राहत व्यवस्थापनका लागि नेपाल प्रहरी, नेपाली सेना, सशस्त्र प्रहरी बल र सम्बन्धित सरकारी निकायहरू संयुक्त रूपमा परिचालित छन् ।
