तीनदिने भ्रमणका लागि अर्थमन्त्री डा. स्वर्णिम वाग्ले भारत प्रस्थान गरेका छन् । भारत सरकारको निमन्त्रणामा आज बिहान साढे ७ बजेको उडानमा अर्थमन्त्री डा वाग्ले नयाँदिल्ली प्रस्थान गरेका हुन् ।
अर्थमन्त्री डा वाग्लेले भ्रमणका क्रममा विपद्पछिको पुनर्निर्माणलगायत दुई देशबीचको आर्थिक, राजनीतिक र कूटनीतिक विषयमा सहकार्य गर्नु यस भ्रमणको मुख्य उद्देश्य रहेको उनको सचिवालयले जनाएको छ ।
आज साँझ ५ बजे भारतीय समकक्षी निर्मला सीतारमणसँग भेटवार्ता गर्ने तयारी रहेकाे छ भने भालि बिहान भारतका पूर्वविदेशसचिव श्याम शरणले आयोजना गर्ने उच्चस्तरीय कूटनीतिक संवाद कार्यक्रममा प्रमुख अतिथिका रूपमा सहभागी हुनेछन् । भोलि साँझ ५ बजे भारतीय विदेशमन्त्री डा. एस जयशङ्करसँग भेटवार्ताको कार्यक्रम रहेकाे बताइएकाे छ ।
त्यसैगरि अर्थमन्त्री डा वाग्ले भाेलि साँझ साढे ७ बजे भारत व्यापार सम्वर्द्धन सङ्गठनका अध्यक्ष जावेद अश्राफले आयोजना गर्नुहुने बृहत् भेटघाट कार्यक्रममा सहभागी हुनेछन् । शनिबार बिहान साढे ९ बजे भारतीय उद्योग परिसङ्घले आयोजना गर्ने प्रतिष्ठित औद्योगिक घरानासँगको सम्मेलनमा प्रमुख वक्ताका रूपमा सहभागी हुनेछन् भने त्यसपछि साढे ११ बजे दिल्ली स्कुल अफ इकोनोमिक्सले आयोजना गर्ने विकास अर्थनीतिबारे प्राज्ञिक छलफलमा प्रमुख अतिथिका रूपमा सहभागी हुने कार्क्रम रहेको छ ।
शनिबार दिउसाे ४ बजे स्वदेश फर्कने अर्थमन्त्री डा वाग्लेकाे भ्रमण टोलीमा अर्थमन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी, नयाँदिल्लीस्थित नेपाली राजदूतावास उपनियोग प्रमुख डा. सुरेन्द्र थापा र इकोनोमिक्स मिनिस्टर तारानाथ अधिकारी र अर्थमन्त्रीका निजी उपसचिव कञ्चन बस्नेतलगायत रहेका छन् ।
