यातायात व्यवस्था विभागले रसुवाको भोटेकोशी बाढीका कारण सार्वजनिक यातायात क्षेत्रमा भएको मानवीय तथा भौतिक क्षतिको तथ्याङ्क मागेको छ ।
विभागले आज एक सूचना जारी गर्दै त्यस्ता तथ्याङ्क भएमा आगामी सात दिनभित्र उपलब्ध गराउन आग्रह गरेको हो ।
विभागका अनुसार बाढीका लागि सार्वजनिक यातायातसम्बद्ध क्षेत्रमा पर्न गएको मानवीय तथा भौतिक क्षतिको मूल्यांकन, क्षतिपूर्तिको आधार तथा अन्य सम्बद्ध विषयसमेतको आधार निर्धारण राय सुझावसहितको प्रतिवेदन पेश गर्न समिति गठन भएको छ ।
सोही समितिका लागि तथ्याङ्क आवश्यक परेको जनाउँदै विभागले सरकारी निकाय, गैरसरकारी संस्था, मिडिया, निजी संस्घसंस्था, अनुसन्धानकर्ता, सरोकारवाला निकाय तथा आम नागरिकसँग सहयोग मागेको हो ।
विभागको इमेल ठेगानामा विवरण पठाउन सकिनेछ । तथ्याङ्क पठाउँदा संस्थाको हकमा पहिचान खुलाउन र सम्भव भए स्रोतसमेत खुलाएर पठाउन विभागको अनुरोध छ ।
