नेपाल राष्ट्र बैंकले ५० रुपैयाँ दरको नयाँ सिरिज नोट प्रचलनमा ल्याएको छ । राष्ट्र बैंकले साविककै आकार र रंगमा गर्भनर प्रा.डा.विश्वनाथ पौडेलको हस्ताक्षर रहेको नोट आजदेखि चलनचल्तीमा ल्याएको हो ।
नयाँ नोटको संकेत नम्बर ट २४ ०००००१ देखि ण ७० ९९९९९९ सम्म रहेको छ । नोटको अग्रभागको बायाँतर्फ सागरमाथा हिमालको चित्र, दायाँतर्फ लालीगुराँसको पानी छाप र सोको मुनि ‘५०’ अंकित पानी छापसमेत रहेको छ ।
त्यस्तै, तल्लो खण्डमा सिरिज नम्बर ‘वि.सं.२०८२’ लेखिएको छ । नोटमा १.२ मिमी चौडा भएको कागजमा बुनिएको संरक्षण धागोलाई प्रकाशतर्फ पारेर हेर्दा पूर्ण रुपमा देखिने र उक्त धागोमा ‘एनआरबी’ लेखिएको राष्ट्र बैंकले जनाएको छ ।
नोटको पृष्ठभागको मध्यखण्डमा हिउँ चितुवाको चित्र र सोको माथि नेपाल राष्ट्र बैंक लेखिएको छ भने तल्लो खण्डमा ‘रुपिज फिफ्टी’ र सिरिज नम्बर ‘२०२५ एडी’ लेखिएको छ ।
यसअघि मिति २०७७ असार २२ गतेदेखि ५० दर (सिरिज २०१९) को नोट संकेत नम्बर ज ८९ ०००००१ देखि ट ३३ ९९९९९९ सम्म चलनचल्तीमा ल्याइने भनिएपनि संकेत नम्बर ज ८९ ०००००१ देखि ट २३ ९००००० सम्मको मात्र प्रचलनमा ल्याइएको थियो ।
