पछिल्लाे समय कोशी प्रदेशमा डेंगु संक्रमणको प्रकाेप बढ्दै गएको छ । जस मध्ये झापा जिल्लामा डेंगुको संक्रमण सबैभन्दा उच्च देखिएको छ ।
सन् २०२६ को सेप्टेम्बर १९ सम्मको तथ्यांकअनुसार प्रदेशमा ७९३ जनामा डेंगु संक्रमण पुष्टि भएको कोशी प्रदेशको स्वास्थ्य निर्देशनालयका जनस्वास्थ्य अधिकृत स्मृती लुईँटेलले जनाएका छन् । लुईँटेलका अनुसार डेंगुको संक्रमण प्रदेशका १३ जिल्लामा फैलिएको बताइएकाे छ ।
हाल झापामा मात्रै २२८ जनामा संक्रमण पुष्टि भइसकेको छ भने दोस्रो धेरै संक्रमित भएको जिल्ला सुनसरीमा २०३ जनामा संक्रमण पुष्टि भइसकेको बताइएकाे छ । निर्देशनालयका अनुसार ओखलढुंगामा १२२ जना र खोटाङमा ८२ जनामा संक्रमण देखिएको छ ।
त्यसैगरि संखुवासभामा १८, पाँचथरमा ४४, उदयपुरमा ३४, भोजपुरमा ३१, धनकुटामा ४, मोरङमा २०, सोलुखुम्बुमा ३, तेह्रथुममा ३ र ताप्लेजुङमा १ जनामा डेंगु संक्रमण पुष्टि भएको छ । संक्रमणको बढ्दो जोखिमलाई मध्यनजर गर्दै लामखुट्टेको बासस्थान खोज्ने र नष्ट गर्ने लगायतका अभियान सञ्चालन आवश्यक रहेको पनि उनकाे भनाइ रहेकाे छ ।
उक्त अवधिमा विभिन्न जिल्लामा डेंगु संक्रमणका ५१ वटा सम्भावित र दुई वटा शंकास्पद विरामी अस्पतालमा रहेको समेत उनले जानकारी दिएका छन् ।
