नवलपरासी । नेपाली कांग्रेस नवलपरासीका युवा नेता बिबस पौडेलले आगामी जिल्ला अधिवेशनमा महाधिवेशन प्रतिनिधिका लागि उम्मेदवारी दिने घोषणा गरेका छन्। लामो समयदेखि पार्टीको विद्यार्थी तथा संगठनात्मक राजनीतिमा सक्रिय पौडेलले जिल्लामा देखिएको गुटबन्दी र आन्तरिक कलह अन्त्य गर्दै कांग्रेस संगठनलाई थप सुदृढ बनाउने आफ्नो मुख्य एजेन्डा अघि सारेका छन्।
पौडेलले पार्टीभित्र व्यक्तिभन्दा संगठन र गुटभन्दा योग्यतालाई प्राथमिकता दिनुपर्नेमा जोड दिएका छन्। उनले “हाम्रो होइन, राम्रोलाई पार्टीले संरक्षण गर्नुपर्छ” भन्ने मान्यताका साथ आफ्नो उम्मेदवारी अघि बढाएको बताएका छन्।
नेविसंघबाट सुरु भएको राजनीतिक यात्रा
पौडेलले २०६८ सालदेखि सक्रिय राजनीतिमा प्रवेश गरेका हुन्। उनले नेपाल विद्यार्थी संघ (नेविसंघ)को विद्यार्थी राजनीतिबाट आफ्नो राजनीतिक यात्रा सुरु गरेका थिए।
२०६८ सालमा कुमारी इन्जिनियरिङ क्याम्पसको नेविसंघ इकाई सचिवको जिम्मेवारी सम्हालेका पौडेल २०७० सालमा सोही इकाईको सभापति बने। त्यसपछि उनले सीटीईभीटी केन्द्रीय उपाध्यक्षको जिम्मेवारीसमेत सम्हाले।
नेविसंघको ११औँ महाधिवेशनमा उनले कान्छो उम्मेदवारका रूपमा चुनाव लडेका थिए। त्यसपछि २०८० सालमा नेविसंघ केन्द्रीय सदस्यमा मनोनीत हुँदै उनले संगठनात्मक राजनीतिमा आफ्नो सक्रियता निरन्तरता दिएका छन्।
विद्यार्थी राजनीतिबाट सुरु भएको उनको यात्रा विभिन्न संगठनात्मक जिम्मेवारी हुँदै अहिले जिल्ला तहको राजनीतिक नेतृत्वतर्फ अघि बढेको छ।
गुटबन्दी अन्त्य गर्ने मुख्य एजेन्डा
पौडेलले नवलपरासीको कांग्रेस राजनीतिमा पछिल्लो समय बढ्दै गएको गुटबन्दीले संगठनलाई कमजोर बनाएको बताएका छन्। गुटगत राजनीतिका कारण पार्टीभित्र आन्तरिक कलह बढेको र त्यसको असर सामान्य कार्यकर्तामा समेत परेको उनको बुझाइ छ।
यही अवस्थालाई परिवर्तन गर्न आफूले उम्मेदवारी दिएको बताउँदै पौडेलले भने, “म आफ्नै पार्टीभित्रको आन्तरिक गुटबन्दीलाई यो अधिवेशनबाट रोक्ने प्रयास गर्नेछु। साथै समग्र जिल्लालाई केन्द्रसँग जोड्ने पहल गर्नेछु।”
उनले योग्य, इमानदार र जनतासँग प्रत्यक्ष जोडिएका कार्यकर्तालाई अवसर दिने वातावरण निर्माण गर्नुपर्नेमा जोड दिएका छन्। जिम्मेवारी बाँडफाँटमा गुटभन्दा क्षमता, योगदान र संगठनप्रतिको प्रतिबद्धतालाई आधार बनाउनुपर्ने उनको धारणा छ।
युवा र कार्यकर्तालाई समेट्ने प्रतिबद्धता
महाधिवेशन प्रतिनिधिका रूपमा निर्वाचित भए जिल्लाको संगठनलाई थप चलायमान बनाउने, केन्द्रसँग प्रभावकारी समन्वय गर्ने तथा पार्टीलाई जनतासँग अझ नजिक बनाउने पौडेलले बताएका छन्। ।
उनले युवा, महिला तथा सबै तहका कार्यकर्तालाई संगठनमा सक्रिय रूपमा समेट्दै स्वस्थ आन्तरिक प्रतिस्पर्धाको संस्कार विकास गर्नुपर्ने बताएका छन्। ।
आगामी १० गते हुने अधिवेशनलाई लक्षित गर्दै पौडेलले कांग्रेसका सम्पूर्ण सदस्य, शुभेच्छुक तथा जिल्लावासीसँग आफूलाई समर्थन गर्न आग्रह गरेका छन्। आफ्नो उम्मेदवारी व्यक्तिगत महत्वाकांक्षाभन्दा जिल्लाको राजनीतिक सुधार र संगठन सुदृढीकरणका लागि भएको उनको भनाइ छ।
उनले आफ्नो विजयलाई व्यक्तिगत उपलब्धिका रूपमा नभई नवलपरासी कांग्रेसमा संगठनात्मक सुधार, एकता र नयाँ राजनीतिक संस्कार निर्माणको अवसरका रूपमा लिन आग्रह गरेका छन्। ।
