वैदेशिक रोजगारीकाे प्रलाेभनमा पारी ठगी गर्ने दुई जना पक्राउ परेका छन् । विदेश पठाइदिने भन्दै ९४ लाख रुपैयाँ ठगी गरेको आरोपमा प्रहरीले दुई जनालाई पक्राउ गरेको हाे ।
काठमाडौँ उपत्यका अपराध अनुसन्धान कार्यालय टेकुले धादिङका ईश्वर खतिवडा र लमजुङका खर्वा तामाङलाई पक्राउ गरेको बताइएकाे छ । प्रहरीका अनुसार खतिवडाले स्लोभानिया र माल्दिभ्स पठाइदिने भन्दै २५ जनाबाट ८५ लाख लिएर सम्पर्कविहीन भएको आरोप लागेको छ ।
त्यसैगरि तामाङले जापान पठाइदिने भन्दै एक जनाबाट नौ लाख लिएको उजुरीका आधारमा पक्राउ गरिएको प्रहरीले जनाएको छ । रकम लिएर विदेश नपठाई सम्पर्कविहीन भएपछि पीडितले उजुरी दिएका थिए ।
उपत्यका अपराध अनुसन्धान कार्यालयका प्रहरी उपरीक्षक रामेश्वर कार्कीका अनुसार खतिवडालाई काठमाडौँ महानगरपालिका–२६, बाट र तामाङलाई काठमाडौँ–९, सिनामङ्गलबाट पक्राउ गरिएको र उनीहरू माथि थप अनुसन्धान भइरहेको बताइएकाे छ ।
