नेपाली कांग्रेसको जारी १५औँ महाधिवेशनअन्तर्गत नयाँ केन्द्रीय कार्यसमिति चयनका लागि बिहान ७ बजेबाट मतदान सुरु भएको छ । यसअघि बिहीबार दिउँसाेबाट मतदान सुरु गर्ने समय तय भएपनि मतदान गर्ने समय आज बिहानका लागि सरेको थियाे ।
आज बिहान ७ बजेदेखि सुरु भएकाे मतदान दिउँसो ३ बजेसम्म हुने निर्वाचन समितिले जनाएकाे छ । महाधिवेशन प्रतिनिधिको संख्या ७ हजार ३१७ रहेको छ भने निर्वाचन समितिले महाधिवेशन प्रतिनिधिको सहजताका लागि विभिन्न मतदान केन्द्र तोकेको छ ।
प्रतिनिधिहरूले आफूलाई तोकिएको प्रदेश तथा समूहअनुसार सम्बन्धित मतदान केन्द्रमा पुगेर मतदान गर्न सक्ने छन् । राष्ट्रिय सभा गृह, मतदान केन्द्र ‘क’मा वाग्मती प्रदेशका प्रतिनिधिले मतदान गर्नु पर्नेछ भने खुलामञ्च, मतदान केन्द्र ‘ख’मा कोशी प्रदेश तथा तराई–मधेश समूहका प्रतिनिधिले मतदान गर्नेछन् ।
त्यसैगरि हिमाल हलमा गण्डकी प्रदेश तथा तराई–मधेश हलमा मधेश प्रदेश प्रतिनिधिले मतदान गर्नेछन् । पहाड हलमा लुम्बिनी, कर्णाली र सुदूरपश्चिम प्रदेश तथा नेपाली जनसम्पर्क समिति र भ्रातृ संस्थातर्फका प्रतिनिधिले मतदान गर्नेछन् ।
निर्वाचन समितिले मतदानस्थलमा प्रवेश गरेपछि प्रतिनिधिहरूलाई आफूलाई तोकिएको प्रदेश तथा समूहको मतदान केन्द्रमा गई मतदान गर्न आग्रह गरेको छ । मतदान गर्नुअघि प्रत्येक प्रतिनिधिको परिचयपत्र तथा मतदाता नामावली रुजु गरिने र रुजु प्रक्रिया पूरा भएपछि मात्रै प्रतिनिधिलाई मतदान गर्ने व्यवस्था गरिएको बताइएकाे छ ।
