आजदेखि देशभरका बालबालिकालाई भिटामिन ‘ए’ र जुकाको औषधि खुवाउने राष्ट्रिय अभियान सञ्चालन गरिदैछ । कात्तिक १७ र १८ गते दुई दिन सञ्चालन हुने अभियानअन्तर्गत पाँच वर्षमुनिका बालबालिकालाई भिटामिन ‘ए’ र जुकाको औषधि खुवाउन लागिएको हो ।
दसैँको बिदाका कारण नियमित तालिका परिवर्तन गरी यस वर्ष कात्तिक १७ र १८ गते अभियान सञ्चालन गर्न लागिएको हो । अभियानअन्तर्गत ६ महिनादेखि ५९ महिनासम्मका करिब २१ लाख बालबालिकालाई भिटामिन ‘ए’ क्याप्सुल खुवाइनेछ भने एक वर्षदेखि पाँच वर्षसम्मका करिब २० लाख बालबालिकालाई जुकाको औषधि दिइने कार्यक्रम रहेकाे छ ।
त्यस्तै ६ महिनादेखि २३ महिनासम्मका बालबालिकालाई बहुसूक्ष्म पोषक तत्त्वयुक्त बालभिटा पनि वितरण गरिने नेपाल सरकारकाे याेजना रहेकाे छ । बालबालिकामा हुने कुपोषण तथा सूक्ष्म पोषक तत्त्वको कमीबाट उत्पन्न हुन सक्ने स्वास्थ्य समस्याको न्यूनीकरण गर्ने उद्देश्यले सरकारले यो अभियान सञ्चालन गर्दै आएको छ। नेपालमा २०५० सालदेखि भिटामिन ‘ए’ र २०५६ सालदेखि जुकाको औषधि खुवाउने कार्यक्रम सुरु भएको हो ।
उक्त कार्यक्रमका लागि देशभर करिब ५२ हजार महिला सामुदायिक स्वास्थ्य स्वयंसेविका र १० हजार स्वास्थ्यकर्मी परिचालन गरिएको छ । स्वास्थ्य तथा जनसंख्या मन्त्रालयले आफ्ना बालबालिकालाई नजिकैको स्वास्थ्य संस्था वा तोकिएको वितरण केन्द्रमा लगेर भिटामिन ‘ए’ र जुकाको औषधि खुवाउन अभिभावकलाई आग्रह गरेको छ ।
यसवर्ष कातिक महिनामा दुई दिनसम्म सञ्चालन हुने यस अभियानमार्फत देशभरका लक्षित बालबालिकालाई आवश्यक पोषण तथा स्वास्थ्य सेवा पुर्याउने लक्ष्य राखिएको छ ।
