काठमाण्डू, नेपाली कांग्रेसले नेपालको विकासमा एआई (कृतिम बौद्धिकता) सम्बन्धी विशेष अन्तरक्रिया कार्यक्रम गर्दै छ।
पार्टीको विज्ञान तथा सूचना प्रविधि विभागको आयोजनामा केन्द्रीय कार्यालय सानेपामा आइतबार बिहान १० बजेदेखि हुने कार्यक्रमको उद्घाटन सभापति शेरबहादुर देउवाले गर्नेछन्।
कार्यक्रममा एआईको विकास, नीति, नेतृत्व र सम्भावनाबारे गहन छलफल हुने विभाग संयोजक सुशीला मिश्रले जानकारी दिएकी छन्।
कार्यक्रममा कांग्रेस केन्द्रीय सदस्य डा. मीनेन्द्र रिजालले प्रविधिको द्रुत विकाससँगै एआईको प्रयोगबारे धारणा राख्नेछन्।
यसैगरी कार्यक्रममा एआईको सम्भाव्यता, उपयोग र चुनौतीबारे टुटलका संस्थापक तथा उद्यमी इन्जिनियर शिक्षित भट्ट, सञ्चार तथा सूचना प्रविधि मन्त्रालयका सहसचिव आदेश खड्का, काठमाडौँ विश्वविद्यालयका प्रा. डा. सुदन झा, प्रधानमन्त्री कार्यालयअन्तर्गत ई-गभर्नेन्स आयोगका प्रमुख कार्यकारी अधिकृत इन्जिनियर दीपेश विष्ट तथा नेपाली कांग्रेसको प्रविधि विभाग सदस्य इन्जिनियर उज्ज्वल कोइराला प्यानल छलफलमा सहभागी हुनेछन्।
कार्यक्रममा नेपालको विकासमा एआईसम्बन्धी नीति निर्माण, पूर्वाधार विकास, शिक्षादेखि रोजगारीसम्मका प्रभावबारे समग्र दृष्टिकोणमा छलफल हुने विभाग संयोजक मिश्रले बताएकी छन्।
कांग्रेसले एआईसम्बन्धी बृहत् छलफल पहिलोपटक गर्न लागेको हो।
