काठमाण्डू, नेकपा एमालेका अध्यक्ष केपी ओलीले आजको लोकतान्त्रिक अधिकार र स्वतन्त्रता सहिदहरूले रोपेको आन्दोलनको बीऊका कारण सम्भव भएको बताएका छन्।
आज सहिद दिवसको अवसरमा शुभकामना सन्देश दिँदै उनले वि.सं. १९९७ मा प्रजातन्त्रका लागि आफ्नो प्राण आहुति दिने चार वीर सहिदहरूको स्मरण गरेका हुन्।
अध्यक्ष ओलीले सहिद दिवसलाई क्यालेन्डरको एउटा मितिको रूपमा मात्र सीमित राख्न नहुनेमा जोड दिएका छन्।
उनले लेखेका छन्, “आजको समयमा उभिएर हेर्दा यो दिन केवल एउटा मिति जस्तो लाग्न सक्छ, तर विगतलाई फर्केर हेर्दा हामीले अहिले उपभोग गरिरहेको स्वतन्त्रता कति ठूलो त्यागबाट प्राप्त भएको हो भन्ने प्रष्ट हुन्छ।”
राणा शासनको क्रुरता र मृत्युदण्डको सामना गर्दै शुक्रराज शास्त्री, धर्मभक्त माथेमा, दशरथ चन्द र गङ्गालाल श्रेष्ठले प्रजातन्त्रको आवाज उठाएको प्रसङ्ग उल्लेख गर्दै ओलीले त्यसै सङ्घर्षले लोकतान्त्रिक अधिकार स्थापित गर्ने जग बसालेको बताएका छन्।
उनले वर्तमान राजनीतिक उपलब्धिलाई कम्युनिस्ट र कांग्रेसको संयुक्त आन्दोलनको महत्वपूर्ण उपजका रूपमा चित्रण गरेका छन्।
अध्यक्ष ओलीले राष्ट्रिय स्वाधीनता र लोकतन्त्रको रक्षा गर्ने सङ्कल्प गर्दै अमर सहिदहरूप्रति हार्दिक श्रद्धाञ्जली व्यक्त गरेका छन्।
