नवनिर्वाचित प्रधानमन्त्री वालेन्द्र शाहले आगामी आर्थिक वर्षको बजेट सन्तुलित बनाइने बताएका छन् । हिजाे प्रधानमन्त्री तथा मन्त्रीपरिषद्काे कार्यालय, सिंहदरबारमा भएकाे कर्णाली प्रदेशका संघीय सांसदहरुसँगको छलफलमा प्रधानमन्त्री शाहले बजेटमार्फत कर्णाली प्रदेशलाई न्यायोचित सम्बोधन गरिने बताएका हुन् । ।
उक्त छलफलमा प्रधानमन्त्री शाहले सरकारले यस वर्ष शासकीय सुधारमा केन्द्रित रहेर काम गर्ने समेत स्पष्ट पारका थिए । छलफलमा सहभागी सांसदहरुले आगामी वर्षको बजेटमा कर्णालीलाई पहिलो प्राथमिकता दिन, प्रदेशको शासकीय सुधार तथा भौतिक पूर्वाधार निर्माणलगायत बारेमा प्रधानमन्त्रीको ध्यानाकर्षण गराएका थिए ।
त्यसैगरि छलफलमा जाजरकोट भूकम्पपछिको राहत तथा पुनर्निर्माण, मनसुनपूर्व तयारी, कर्णाली, भेरी, राप्तीलगायत विभिन्न सडक करिडोर तथा मध्यपहाडी, मदनभण्डारी, लुम्बिनी–रारालगायत लोकमार्ग तथा सडक पूर्वाधार, स्वास्थ्य बिमा, मातृ–शिशु पोषण, दैलेखको पेट्रोलियम खानी अनुसन्धान, वन्यजन्तुबाट हुने जोखिम व्यवस्थापन साथै सञ्चार, विद्युत्, खानेपानी, सिँचाइ, कृषि, वन, पर्यटन, शिक्षा क्षेत्रका प्राथमिकताबारे प्रधानमन्त्रीसँग कुरा राखिएकाे बताइएकाे छ ।
उक्त छलफलमा कर्णाली प्रदेशबाट प्रतिनिधिसभामा प्रतिनिधित्व गर्ने नेपाली कम्युनिष्ट पार्टी, नेपाल कम्युनिष्ट पार्टी (एमाले), नेपाली कांग्रेस र राष्ट्रिय प्रजातन्त्र पार्टीका सांसदहरु सहभागी रहेका थिए ।
