गत फागुन २१ गते सम्पन्न भएकाे प्रतिनिधिसभा सदस्य निर्वाचनका लागि स्थगित गरिएकाे मतदाता नामावली संकलन आजबाट सुरु भएकाे छ । गत मंसीर ६ गतेदेखि स्थगित गरिएकाे मतदाता नामावली संकलन आजबाट सुरु गरिएकाे हाे ।
यही चैत १८ गते बसेकाे निर्वाचन आयोगको बैठकले मतदाता नामावली संकलनको काम सुरु गर्ने निर्णय गरेकाे थियाे । आयोग स्थगित गरेकाे उक्त कार्यक्रम आजदेखि पुनः सञ्चालन गर्न लागिएको आयोगका सहसचिव एवं प्रवक्ता नारायणप्रसाद भट्टराईले जनाएका छन् ।
राष्ट्रिय परिचयपत्र भएका व्यतिकाे हकमा आयोगले राष्ट्रिय परिचयपत्रको विवरणमार्फत अनलाइन प्रणालीबाटै नाम दर्ता गर्न सकिने व्यवस्था मिलाइएको छ भने राष्ट्रिय परिचयपत्र प्रणालीमा आबद्ध नभएकाहरूको हकमा मतदाता नामावलीका लागि आयोगको ‘प्रि इनरोलमेन्ट’ प्रणालीमार्फत अनलाइन फारम भर्नुपर्ने छ । आफ्नो फोटो तथा औठाछापसहितको जैविक विवरणका लागि निर्वाचन कार्यालयमा आवेदक स्वयं भौतिक रूपमा उपस्थित हुनुपर्नेछ ।
आयोगका अनुसार मतदाता नामावलीमा रहेको त्रुटि सच्याउन, दोहोरो नाम हटाउन, मृत्यु तथा बसाइँसराइको विवरण अद्यावधिक गर्नेलगायतका कार्यका लागि पनि अनलाइन माध्यमबाट आवेदन गर्न सकिने व्यवस्था मिलाइएको बताउँदै आयोगले मतदाता नामावली संकलन प्रक्रियामा सक्रिय सहभागिताका लागि आग्रह गरेको छ ।
