रसुवाको भोटेकोशी नदीमा आएको विनाशकारी बाढीबाट प्रभावित नागरिकहरूको उद्धार र राहतका लागि नेपाली सेफ सोसाइटीले २ लाख ५९ हजार २ सय ८७ रुपैयाँ आर्थिक सहयोग प्रदान गरेको छ।
संस्थाले आफ्नो सामाजिक उत्तरदायित्व अन्तर्गत उक्त रकम प्रधानमन्त्री दैवी प्रकोप उद्धार कोषमा जम्मा गरेको हो ।यस मानवीय कार्यका लागि संस्थागत कोषका साथै विश्वभर कार्यरत नेपाली सेफहरूले व्यक्तिगत रूपमा समेत आर्थिक योगदान गरेका छन्। देश तथा विदेशमा रहेर पनि संकटको घडीमा आफ्ना नागरिकको दुःखमा साथ दिने सेफहरूको यो ऐक्यबद्धता निकै प्रशंसनीय रहेको सोसाइटीले जनाएको छ।
सोसाइटीका अध्यक्ष एलबी कौशलका अनुसार, विपदमा परेका नागरिकको पीडामा मलम लगाउनु नै प्रमुख मानवीय दायित्व हो। नेपाली सेफहरू देशमा हुन् या विदेशमा, आफ्ना देशवासीको दुःखमा सधैँ एकजुट भएर उभिने भावनाका साथ यो सहयोग गरिएको उनले बताए। साथै, अध्यक्ष कौशलले प्रभावित परिवारको राहत, उद्धार र पूर्ण पुनःस्थापनाका लागि समाजका सबै क्षेत्रबाट थप सहयोग र सहकार्य आवश्यक रहेकोमा जोड दिएका छन्।
