खाना पकाउने ग्यास आपूर्तिलाई सहज बनाइराख्न साल्ट ट्रेडिङ कर्पोरेशन लिमिटेडले निजी ग्यास कम्पनीसँगकाे सहकार्यमा ‘एसटिसी सिलिन्डर’मा ग्यास भर्न सुरु गरेको छ ।
धादिङको कृष्णभीरमा त्रिशूली नदीले कटान गरेर पृथ्वी राजमार्ग पूर्ण अवरुद्ध बनाएपछि कर्पोरेशनले नयाँ विकल्पको खोजी गर्दै निजी ग्यास कम्पनीको ग्यास प्लान्टमा आफ्ना ‘एसटिसी सिलिन्डर’मा ग्यास भरेर (बोटलिङ) काठमाडाैँ ल्याउन लागेको हो ।
उक्त राजमार्ग अवरुद्ध हुँदा कर्पोरेशनको धादिङ जुगेखोलास्थित ‘एलपिजी प्लान्ट’मा पनि असर परेको र आफ्नो प्लान्टमा ग्यासको बुलेट आउन सम्भव नभएपछि कर्पोरेशनले तत्काल अन्य निजी क्षेत्रका सहज स्थानमा रहेका मनोजसहित बाबा ग्यासका ‘प्लान्ट’सँग सहकार्य गरेर आफ्ना खाली सिलिन्डरमा ग्यास भरेर वैकल्पिक मार्गबाट उपत्यका भित्र्याउने प्रबन्ध मिलाएको हो ।
प्राकृतिक विपद्को अवस्थालाई मध्यनजर गर्दै कर्पोरेशनले उपभोक्तालाई ग्यासको अभाव हुन नदिन उक्त नीति अवलम्बन गरेको कर्पोरेशनका सहायक प्रमुख कार्यकारी अधिकृत बज्रेश झाले जनाएका छन् । उनका अनुसार दुई निजी प्लान्टमा भरिएका आफ्ना ग्यासका सिलिन्डर काठमाडौँ आइपुग्ने बताइएकाे छ ।
साल्ट ट्रेडिङ कर्पोरेशनले आफ्नो ग्यास प्लान्टका लागि छुटेका केही ग्यासका बुलेट उक्त निजी कम्पनीमा ‘डाइभर्ट’ गरेको समेत बताइएकाे छ ।
